Mga abandonadong bata aduna nay bag-ong kapuy-an

CEBU, Philippines - Human sa duha ka tuig  paglabay sa bagyong Yolanda ang mga bata sa House of Hope sa dakbayan sa Bogo nakabaton na karon og bag-ong pinuy-anan.

Ang House of Hope usa kini sa orphanage nga nahimutang diha sa Barangay Marangon sa nahisgutang siyudad human ang balay nga ila kaniadtong gipuy-an naguba sa bagyong Yolanda.

Si Bokal Celestino Martinez, III nagkanayon nga human maguba ang gipuy-an sa mga orphans ug sa caretaker niini ang city engineers sa Bogo nagkanayon nga dili na kini angayang ayuhon pa tungod kay dili na stable ang estraktura.

Apan bisan pa niini, ang madre nga caretaker ug ang mga bata wala kini mobiya sa lugar.

 Ang orphanage gibalhin kini ngadto sa bag-ong lugar sa Barangay Cayang, Bogo diin ang lote nga gitukuran gidonar ni Sra. Nilda Espinosa Martinez.

Ang CEMEX Philippines maoy mipatukod sa bag-ong building sa orphanage.

Ang bag-ong estraktura nga gitukod gilangkuban sa subra 10 ka kwarto lakip niini ang chapel, pantry, play room, guest rooms, offices ug uban pa.

Si Bise Gobernador Agnes Magpale nagkanayon nga ang House of Hope puwede nga maka-accommodate og kababayen-an o kabataan kinsa biktima sa pagpangabuso .

Si Sister Flor sa Daughters of Charity of the Most Precious Blood mapasalamaton kaayo ngadto sa mga tawo nga mitabang sa pagpatuman sa maong proyekto. (BANAT NEWS)