Inahan na-black eye human sukmaga sa anak

CEBU, Philippines — Natingkagol sa detention cell sa Mabolo Police Station sa Cebu City Police Office (CCPO) ang 24-anyos nga lalaki human kini nanukmag sa iyang 44-anyos nga inahan kagahapon sa hapon diha sa Sitio Cabungahan, Barangay Busay. Dakbayan sa Sugbo.

Giingong ang suspetsado nasuko kini nga giyawyawan sa iyang inahan.

Ang biktima mao si alyas “Gina” ug ang suspetsado mao ang anak niini nga si alyas Jay, parehong residente sa naasoy nga lugar.

Base sa imbestigasyon sa kapolisan nga ang suspetsado adunay duha ka anak diin ang kinamanghuran nagpangedaron og lima ka buwan.

Ang suspetsado maoy nagbantay sa iyang mga anak tungod kay ang iyahang asawa maoy nanarbaho.

Apan niadtong Sabado sa gabii giingong nilakaw ang suspetsado ug gibiyaan ang iyahang mga anak ug kagahapon na sa buntag niuli.

Ang biktima maoy naproblema sa iyang mga apo hinungdan nga giyawyawan niini ang suspetsado dihang nauli na kini.

Ang suspetsado nasuko kini ug gisukmag ang iyang inahan tulo ka higayon sa ulo hinungdan nga na-black eye ang biktima.

Nasayran nga dili kadto ang unang higayon nga gidapatan sa suspetsado ang iyahang inahan tungod kay kaniadto giingong iyaha usab nga gipatiran ang iyahang inahan. (BANAT NEWS)