Incentives sa mga taga Kapitolyo seguro na

CEBU, Philippines - Giaprobahan kagahapon sa special session sa hunta probinsiyal sa Sugbo ang kapin sa P230 milyones. Ang P20.5 milyones niini alang sa incentives sa 1,430 ka kawani sa Kapitolyo nga gikatakda’ng ihatag sunod semana.

Ang matag kawani nga naglakip sa mga casual ang makadawat og tag P15,000 kung sila nakatrabaho sulod sa upat ka buwan kon sugod niadto’ng Septiyembre samtang ang mga job order makadawat lang og “in-kind”. Matud ni Provincial Budget Officer Danilo Rodas nga ang gobernador nakahukom nga mohatag og incentives human nga ang Probinsiya sa Sugbo napili’ng usa sa competitive province lukop nasud. Samtang ang P198 milyones sa nahisgutang supplemental budget ang igahin alang sa heavy equipment ug ubang proyekto.

Gibutyag ni Rodas nga ang probinsiya adunay P50 milyones nga pundo alang sa pagpalit og heavy equipment ug ang P200 milyones  nga idugang kuhaon gikan sa loan sa Land Bank of the Philippines. Gipasabot ni Rodas nga usa sa rekisitos sa bangko ang napasar nga appropriation ordinance sa pagseguro nga ang probinsiya adunay igahin nga pundo nga ibayad sa loan sulod sa lima ka tuig. (BANAT NEWS)