COMELEC: Ayaw gamita ang kriminal
CEBU, Philippines - Nanawagan si Provincial Election Supervisor, Atty. Lionel Marco Castillano, sa mga kandidato nga dili mogamit og mga kriminal sama sa mga gun-for-hire isip private army o security panahon sa eleksiyon.
Matud ni Castillano nga ang Comelec, kapolisan ug kasundaluhan mogukod gyud sa mao’ng mga criminal elements nga himuong private army.
“Kamo ra gihapo’y maproblema kung inyo na’ng gamiton. The full force of the law will be implemented against you,” matud ni Castillano.
Gibutyag ni Castillano nga niini’ng ulahi lang ang Comelec ug mga opisyal sa kapolisan nagpahigayon og initial meeting diin ang kabahin sa augmentation force sa eleksiyon ang usa sa nahisgutan.
Matud ni Castillano nga nalakip sa pagtuki sa mao’ng tigum ang mga nahitabo’ng electoral violence sa nilabay’ng mga eleksiyon diin ila’ng nabantayan nga ang mga gun-for-hire nga gigamit sa mga drug lord mao usab ang gigamit nga private armed group sa ubang kandidato.
Si Castillano nagkanayon nga buot nila’ng mopatigbabaw ang gusto sa katawhan ug gipahimangnoan nila ang mga kandidato nga dili gyud mogamit og mga kriminal isip security o private army.
Dugang panawagan ni Castillano nga unta ang mga kandidato dili mogamit og mga pusil aron hadlukon ang mga botante tungod kay ang ila’ng makontra niini ang balaud na ug dili ang mga botante. (BANAT NEWS)
- Latest
