Davide: Pagpagawas sa priso sa CPDRC wa’y sayop

CEBU, Philippines – Wala’y nakita’ng dautan si Gobernador Hilario Davide III sa pagpagawas sa piniriso sa Cebu Provincial Detention and Rehabilitation Center tungod kay gidala kini sa tambalanan human mabali ang tiil atol sa pagduwa og basketball.

“Magpaabot pa ta og court order aron dalhon sa hospital unya kung kamatyonon na ang pasyente?” matud ni Davide.

Si Davide nagkanayon nga base sa pakisusi niya kang CPDRC consultant Marco Toral, ang inmate nagkinahanglan gyud nga madala dayon sa tambalanan.

Gipasabot usab sa gobernador nga posible’ng alang sa seguridad ni Bienvenido Noel, 52-anyos, tungod sa posible’ng may nagdumot niini hinungdan nga gipaalyas og pangalan.

Ang angayan unta nga modesisyon mao ang warden nga si Romeo Manansala apan matud ni Davide nga instinct sa tawo nga modesisyon dayon kung duna’y makita’ng tabangunon hinungdan nga si Toral wala na maghuwat ni Manansala.

Si Toral niangkon nga gidala niya sa Cebu Doctor’s Hospital si Noel niadto’ng Oktubre 18 ug 19 bisan og wala’y court order.

Si Noel kinsa nag-atubang og kaso’ng murder giingong gipaalyas kini og laing pangalan aron dili mahibaw-an nga gipagawas nga wala’y court order.

Ang Department of Justice niawhag sa Mandaue City Court sa pagpaesplikar sa duha ka opisyal sa CPDRC nga sila si Toral ug Manansala sa pagpagawas og piniriso nga wala’y court order.

Si Assistant State Prosecutor Juan Pedro Navera nagkanayon nga si Toral ug Manansala nakahimo og kalapasan sa court procedures ug nagpakita kini nga wala sila’y respeto sa korte sa pagpagawas kang Noel. – /GMR) (BANAT NEWS)