Magpa-exempt sa gun ban paduolon sa Comelec

CEBU, Philippines – Manawat na ang Commission on Elections og aplikasyon niadtong mga pribadong establisamento o tawo nga gustong mo-apply og Comelec gun ban exemptions sugod karong semanaha subay sa Comelec Resolution No. 10015.

Si Provincial Comelec officer, Lionel Marco Castillano nagkanayon nga ang gun ban wala magpasabot nga pusil lang ug bala ang gidili. Nalakip sa gidili ang pagdala og tanang matang sa hinagiban nga makapatay lakip sa kutsilyo.

Apan ang mga polis, sundalo ug government law enforcement agencies ang exempted niini basta sila magsuot sa ilang kompletong uniporme , on-duty sila ug diha sila sa ilang hurisdiksyon nagdaladala sa ilang armas.

Lakip sa exempted mao kadtong mga pribadong tawo nga gitahasan sa pagdala og dagkong kantidad sa kwarta sama mga cashiers, disbursing officers, security agencies ug uban pa may pagkaparehas niini ang klase sa ilang trabaho.

Samtang kadtong mga kandidato gikan sa kongresista ug gobernador pataas o pribadong mga tawo nga adunay hulga sa kinabuhi ug nagkinahanglan og bodyguards mahimong makakuha og exemption diha sa Comelec basta sundon ang mga proseso.

Ang mga kongresista ug gobernador gitugotang makabaton og duha ka police security ug kun angayang dugangan ilang bantay tungod sa hulga mahimo silang makadugang og duha pa ka polis.

Sa pagkakaron, mahimo na nga adto i-proseso online sa website sa Comelec ang ilang aplikasyon ug mahimo usab nga mag-download sa mga dokumento gikan sa ilang website alang sa maong katuyoan.

Ang Comelec elections gun ban magsugod unya sa Enero 10, 2016 hangtud sa Hunyo 8, 2016. Kini ubos 120 ka adlaw sa dili pa ang eleksiyon ug 30 ka adlaw human sa eleksiyon. – /EIM) (BANAT NEWS)