OTS sa MCIA nagpamisa luyo niining ‘tanim bala’ scheme

CEBU, Philippines – Usa ka Santos nga Misa ang gipahigayon sa chapel sa Mactan-Cebu International Aiport sa dakbayan sa Lapu-Lapu sa miaging Domingo alang sa 134 ka mga screening officers sa Office for Transportation Security nga nagbutang og pink ribbon sa ilang mga bukton, luyo niining kontrobersya sa “laglag bala” diha sa mga tugpahanan sa nasud.

Nagkanayon si Jemar Nietes, supervisor sa OTS nga ang solidarity mass gihimo aron dili maapektahan ang ilang hunahuna samtang nagtrabaho isip tigbantay pagpalusot og mga kontrabando diha sa mga tugpahanan alang sa kaluwasan sa mga pasahero.

Ang OTS nabutang sa kontrobersiya human nga nigawas ang “laglag bala o tanim-bala scheme” sa Ninoy Aquino International Airport nga gisaway og maayo tungod kay nasuta nga adunay naghimo niini aron pangwartahan ang mga pasahero.

“It is a solidarity mass we offered to screeners not to be affected professionally because indeed we are affected personally with the issue,” paambit ni Nietes sa Banat News.

Dugang ni Nietes, kinahanglang di mawala ang pokus sa mga screening officers tungod kay sensitibo ang ilahang trabaho sa seguridad sa mga pasahero.

“It is very sensitive and their (OTS) decision-making is very critical in determining and interpreting an image which is prohibited,” matud ni Nietes.  Ang mga sakop sa OTS sa MCIA ila usab gipahinungod sa ilang mga kauban agi og simpatiya sa giatubang nilang mga alegasyon karon nga diin gihukman na silang tanan sa publiko bisan wa pa mamatud-ing sad-an.

“The mass also is a form of sympathizing and seeking justice to our colleagues who are publicly humiliated with the allegations that are not yet proven and we are being generalize by some people,” dugang ni Nietes.

Matud pa sa kadagkoan sa MCIA nga naglakip sa ilang general manager nga si Nigel Villarete sa milabay’ng press conference,  kaniadto pa pirme na silang nakadakop og mga pasaherong magdala og tagsa ka bala nga gigamit nilang anting-anting.

Nibuto ang maong isyu niini lang tuiga dihang adunay nag-post sa social media bahin sa modus ug sagunson na ang gipang-post sa nagkalain-laing mga pasahero hinungdan nga gipistahan sa internet ug gisaway ang OTS.

Apan niadtong tuig 2014, gikan sa buwan sa Abril hangtud sa Disyembre adunay nasakmit nga 1,386 ka bala nga anting-anting ug ang 297 niini mobuto pa diha sa MCIA, ug karon lang tuiga gikan Enero hangtud sa buwan sa Nobiyembre, 1,044 na ka anting-anting ang nasakmit ug 281niini ang mobuto pa. – /EIM) (BANAT NEWS)