Mga merkado sa siyudad sa Talisay gi-inspection

CEBU, Philippines — Kinalit nga pag inspeksyon ang gihimo sa nagdumala sa merkado sa Dakbayan sa Talisay ngadto sa ginagmay nga “tiange” o talipapa.

Kini maoy gibutyag ni Ronaldo Kapa Jr., market supervisor sa dakbayan.

Matud pa niya nga dili lang sila kutob sa merkado sa Tabunok kundi lakip ang ilang hurisdiksyon ngadto sa nagkatag nga talipapa.

Asoy pa ni Kapa nga nagkalain-lain ang ilang tuyo sa pag inspeksyon lakip na dinhi aron masiguro nga walay tikas sa timbangan, presko ang mga baligya nga karne ug uban pa.

Naglaraw si Kapa nga mogahin sila og pundo alang sa pagpalit og timbangan ng bayan aron ibutang sa mga talipapa.

Mao kini ang ilang gipangbutang sa merkado sa Tabunok diin ang kustomer nga magduda sa timbang sa ilang gipalit mahimong motimbang niini ug mao kini ang basehan sa tinuod nga timbang sa ilang gipalit.

Si Kapa nitataw nga giapil nila sa pagpahinumdom sa mga mamaligyaay nga ipatuman ang single-use plastic sa adlaw nga Miyerkules.

Ang polisiya ila nang napatuman sa merkado sa Tabunok ug gusto nila nga ipatuman kini sa uban pa nga merkado. (BANAT NEWS)