P20M smuggled nga sigarilyo

CEBU, Philippines — Gironda sa mga sakop sa Bureau of Internal Revenue-7 kauban ang kapolisan sa Police Regional Office-7 ang mga bodega sa mga gi-smuggle nga sigarilyo diha sa Espina Compound, Sitio Sta. Cruz, ug sa A.S. Fortuna Extension corner A. Del Rosario Street sa Barangay Guizo, Mandaue City.

Duha ka tawo ang nadakpan sa operasyon ug nasakmit ang mga nagkalain-laing brand sa mga imported apan smuggled nga sigarilyo.

Nasakmit sa operasyon ang 334 master cases ug 167,765 ka kahang sigarilyo, dugang lima sab ka kahon nga dunay 2,500 ka kahang sigarilyo nga gibanabanang mokantidad og P20,431,800.00. Kada stick sa sigarilyo nagkantidad og P6.00.

Ang mga brands sa sigarilyo nga nasakmit naglakip sa Alpen Green, Champion Green, United Menthol Green, Victor Agila Menthol Green, Trojen Green, Rosean Gold, Alpha Red, ug D and J Premium.

Matud pang Police Brigadier General Redrico Maranan, ang direktor sa PRO-7 kini nga operasyon direktang paggukod ug pagsanta sa smuggling ug pagkuyanap aning mga dili rehistradong sigarilyo.

Matud pa niya, dako kining hulga sa mga lehitimong negosyante og sigarilyo nga nibayad og buhis samtang dili sab makasiguro ang publiko kun luwas ba kining gamiton.  “We are committed to safeguarding our communities and strengthening the integrity of our economy," matud pang Maranan.

Ang mga dinakpan ug mga ebidensiya gidala sa mga sakop sa Regional Special Project Unit 7, (RSPU7)  samtang giandam na ang kasong ipasaka batok kanila nga kalapasan sa Republic Act 10863 (Customs Modernization and Tariff Act). — (FREEMAN)