Usa patay, polis naangol

CEBU, Philippines — Niresulta sa engkwentro ang pagresponde sa mga sakop sa Special Weapons and Tactics (SWAT) Cebu City Police Office sa alarma bahin usa ka armadong tawo diha sa Balagtas Street, Barangay Pahina Central, siyudad sa Sugbo kagahapon sa buntag, Huwebes, Marso 27, 2025 nga niresulta sa pagkapatay sa suspek ug pagkaangol sa usa ka polis.

Ang namatay mao si Ricardo Regidor alyas Kardo, taga Sitio Mohon, Barangay Napo, dakbayan sa Carcar.

Matud pa babaye ang hinungdan sa maong kagubot kay ang namatay adunay karelasyong babaye nga usa ka minyo.

Ang bana sa babaye nga si Frank Lopez, 40, gikataho nga nagsige og badlong sa duha nga undangon ang ilang immoral nga relasyon  tungod duna silay mga anak.

Naabot na sila og barangay kaniadto aron husayon apan bisan paman niini giingong nagpadayon gihapon sa ilang relasyon ang duha.

Kagahapon sa buntag, si Frank kinsa usa ka barbero padung na unta manupi sa dihang nakita kini sa suspek ug dayun nibunot ang naulahi og kalibre .45.

Nidagan si Lopez nitago sa balay sa silingan kay ang suspek nisulod man sa ilang balay. Ang mga silingan nangayo og tabang sa Barangay Pahina Central ug  sa kapolisan.

Daling nangabot ang mga sakop sa SWAT apan pagkakita kanila sa suspek gikatahong gipusil dayun sila niini hinungdan sa pagkaigo sa ulo sa usa sa mga polis.

Mibawos ang mga polis ug niresulta sa kamatayon sa suspek.

Si Pahina Central Barangay Councilor Nigel  Borlasa nga Chairman sab sa Peace and Order Committee mibasol sa babaye nga maoy nagsige og sulsol sa suspek.

"Mapakalma ra man unta ‘to namo siya unya katong iyang uyab-uyab mao may nibabag-babag so murag na trigger siya ba (suspek)," sigon ni Borlasa.

Ang maong babaye gidakop aron pasakaan og kasong kalapasan sa Presidential Decree 1829 kun Obstruction of Justice.

Nitug-an ang babaye nga niadtong Miyerkules sa gabii nakasuyop ang suspek ug nagdaladala na kining daan og armas pang proteksyon matud pa sa iyahang kaugalingon.

"Base sa information na natanggap ko nasa ulo po ang tama niya pero daplis lang," matud ni Police Colonel Enrico Figueroa, acting City Director sa Cebu City Police Office bahin sa iyang sakop nga napusilan. (BANAT NEWS)