MPSA sa mga kompaniya sa minahan tinguha nga bawion ni Garcia

CEBU, Philippines — Buot ni Gobernador Gwendolyn Garcia nga bawion ang Mineral Production Sharing Agreement (MPSA) sa mga dagkong kompaniya sa minahan nga nag-operate sa pipila ka lungsod sa probinsya tungod sa pipila ka kalapasan nga nahimo niini.

Atol sa press conference kagahapon sa Kapitolyo, si Garcia mihimo og eksplinasyon kon nganong miluwat siya sa maong CDO batok sa Apo Land Quarry Corporation (ALQC) ug sa Solid Development Corporation (SEDC).

Sumala sa gobernador nga gawas nga wala magbayad ang maong mga kompaniya sa ilang dues sa Probinsya subay sa ilang gihimong operasyon, ang padayon nga pagkubkob niini nagkaduol na sa mga lugar nga adunay nagpuyo nga mga residente.

Mialma si Gobernador Gwendolyn Garcia sa pasangil nga ang rason nga miluwat siya sa cease and desist order batok sa “earth moving” operations sa duha ka kompaniya sa mina, tungod kay nakulangan siya og komisyon.

“So now, my position really is I wish for the nullification of their MPSAs. I will have to call for the revocation of these MPSA” sumala ni Garcia.

Ang matag kompaniya sa mina, aduna kini gitawag nga Mineral Production Sharing Agreement (MPSA), usa ka kontrata tali sa gobyerno ug sa kompaniya nga nagtugot sa maong kompaniya nga mokubkob sa usa ka lugar sulod sa usa ka period.

Sa bahin sa ALQC, matod ni Garcia adunay walo (8) ka MPSAs ang maong kompaniya nga giluwatan sa Mines and Geosciences Bureau (MGB). Sakop sa maong MPSAs ang 3,302.319 ektarya nga luna nga miabot na sa San Fernando, Carcar, Pinamungajan ug dakbayan sa Toledo.

Sa kahalapad sa MPSAs sa maong kompaniya, nasayran sa Kapitolyo nga nagpadayon kini og kubkob sa mga dapit nga duol na sa mga balay.

Giklaro ni Garcia nga kalapasan kini sa Philippine Mining Act nga nagsaysay nga ang mineral agreement dili mamahimong itugot sa mga lugar duol sa mga public ug pribado nga buildings, sementeryo, archeological ug historic sites, taytayan, highways, waterways, railroads, reservoirs, dams o ubang pampublikong imprastraktura lakip na mga public o private works sama sa plantations o valuable crops, gawas kon adunay pagtugot sa government agency o pribadong entity nga concern.

Matud ni Garcia nga kon wala siya moluwat og CDO, magpadayon ang maong kompaniya sa pagkubkob ug posibleng mausab ang landslide susama sa nahitabo didto sa siyudad sa Naga niadtong tuig 2018.

“How can I allow this now? unya ako pa ang gikulangan og komisyon? it’s the same condition, it’s the same kind of soil, unya moulan man gyud, and it was already proven nga maski tua ra sa layo ang landslide, dako kaayo ang dahili” matud ni Garcia.

Gisubli sa gobernador ang iyang pagluwat sa CDO, aron masiguro ang kaluwasan sa mga residente nga nagpuyo duol sa mga lugar kon asa adunay operasyon ang maong mga kompaniya sa mina. (BANAT NEWS)