White sand beaches sa Sugbo dili angay tamnan og bakhaw
CEBU, Philippines – Ang mga lokal nga kagamhanan sa probinsiya ilabi na kadtong adunay mga white sand beaches giawhag nga ipreserbar ang maong mga baybayon ug dili tamnan og mga bakhaw.
Gihimo kini sa Hunta Probinsiyal aron magamit sa kalungsoran ang natural nga kaanyag sa ilang lugar alang sa turismo.
Lakip sa gustong idili mao ang pagtukod og mga estraktura diha mismo sa puting balas atubangan sa mga pribadong luna o resort owners aron dili maguba ang maanindot nga taas kaayong puti nga baybayon sa mga kalungsoran.
Si Bokal Arleigh Sitoy nagkanayon nga ang probinsiya gigrasyahan kini og mga baybayon nga puti og bas nga maoy ampay sa mga turista gikan sa nagkalain-laing lugar.
Ang paborito o popular kaayo nga destinasyon sa nga turista mao ang mga isla sa Camotes ug Bantayan nga pulos adunay mga puting baybayon.
Gibutyag ni Sitoy nga aduna karoy mga white sand beaches sa maong mga isla nga giugmad aron mapanindot sa nagkadaiyang mga LGUs.
Apan nabalaka si Sitoy nga mangawagtang kining maong mga maanindot nga kabaybayonan nunot niining gihingusgang kampanya pagpananom og mga bakhaw nga proteksyon gikan sa mga bagyo ug ingon man itloganan usab og mga isda. – /EIM) (BANAT NEWS)
- Latest
