Way Haribon nga buhian hangtud dili madakpan ang nagpusil

CEBU, Philippines – Tungod sa walay pagpakabana nga pagpatay sa Haribon (Philippine Eagle) nga si "Pamana" ug padayong gawasnon ang nipusil niini, wa unay buhiang lain pang susamang langgam sa kalasangan sumala pa sa Department of Environment and Natural Resources (DENR).

“Until such time na ma-secure natin ang area at wala  nang threats, at mayroon nang mas mataas na appreciation ng Philippine eagle ang ating mga kababayan, [wala munang pakakawalan],” sumala pa ni DENR Biodiversity Management Bureau chief Theresa Mundita Lim sa report sa dzBB radio nga gikutlo sa GMA News Online.

Matud pa niya, nagtinguha g’yud silang madakpan ang nipusil kang Pamana tungod kay dako kaayo ang kahigayonan nga dili kini magpanuko pag-usab og pusil og laing Haribon kun iyang makita sa kalasangan.

Kahinumdoman nga gibuhian si Pamana niadtong Hunyo 12 ning tuiga atol sa Independence Day, duha ka tuig human kini naalim human napalgang samaron tungod sa duha ka samad pinusilan niadtong bag-ohay pa kining nakat-ong makalupad niadtong 2012.

Apan niadtong Agosto 16 niini gihapong tuiga, napalgan na usab kini apan patay na ug adunay samad pinusilan sa dughan diha mismo sa Mount Hamiguitan Range Wildlife Sanctuary sa Davao Oriental.

Ang Haribon o Philippine Eagle (Pithecophaga jefferyi) nga dinhi lang makita sa Pilipinas gikonsiderar na nga endangered specie tungod kay maihap na lang sa tudlo ang gidaghanon niini sa tibuok sa Pilipinas.

Ang DENR nagbutang og P200 mil nga ganti ni bisan kinsang tawo o grupo nga makatug-an kun si kinsa ang nipatay sa maong langgam.

Tungod sa nahitabo, nagplano ang DENR nga magpatabang sa Department of Interior and Local Government ug Philippine National Police aron idili na ang pagbaton og mga armas duol ug sa sud sa protected areas ug  wildlife sanctuaries sama sa Mt. Hamiguitan.

Ang pagpatay og bisan unsang mananap ihalas nga “critically endangered Philippine species” sama sa Haribon adunay silot nga 12 ka tuig nga pagkabilanggo ug multa nga P1 milyon. (Gikan sa Wires/EIM)