Landslide sa Malubog, duha ka balay naigo

CEBU, Philippines - Duha ka mga panimalay sa Brgy. Malubog ning dakbayan sa Sugbo ang naapektahan  tungod sa pagdahili sa yuta ug nangatumbang kahoy niadtong Martes sa gabii atol sa pagbunok sa ulan.

Matud pa ni Brgy. Kapitan Marjorita Cangmaong nga nahinabi sa Banat News  kusog kaayo ang uwan sa ilang lugar ug nihumok ang yuta sa ibabaw nga bahin ug midahili sa ubos.

Naigo niini ang panimalay ni Wendell Arcillo sa Sitio Pili ug swerte lang walay naangol sa maong insidente. Natumbahan usab sa kahoy ang kwarto sa panimalay ni Dominador Bonghanoy sa Sitio Maling apan walay naigo sa pamilya. Ang kapitan niangkon nga duna silay kabalaka karong naguwan-uwan sa ilang lugar tungod kay adunay mga bato nga modahili kay mohumok man ang yuta. Karong adlaw nga Lunes magtigom ang mga opisyales sa barangay aron tukion kung unsay ilang mahatag nga ayuda ngadto sa mga naapektahan.

Si Konsehal Dave Tumulak, pangulo sa Cebu City Disaster Risk Reduction and Management Office nibutyag sa Banat News nga nakapahigayon na sila og assessment ingon man ang Department of Social Welfare and Services sa lugar. Tungod sa pagdahili sa yuta, dili maagian ang dalan sa lugar hangtud di mahawan ang agianan. (BANAT NEWS)