SRP tunnel wa paagii tungod sa nalimbuwad nga pickup

CEBU, Philippines — Nakasinati og makadiyot nga paghuot sa trapiko ang South Road Properties kagahapon sa buntag tungod sa pagkalimbuwad sa usa ka Toyota Hi-Lux pickup diha sa SRP tunnel.

Ang drayber sa pickup nga si Casing Santiago, gidala sa tambalanan human nga nakaangkon siya og kadaot sa iyang lawas.

Pasado alas-10 kagahapon dihang nahitabo ang aksidente nga nimugna og grabeng traffic sa maong dalan. Ang operations chief sa City Traffic Operation Management (CITOM)  nga si Joy Tumulak miingon nga gikan sa Talisay si Santiago ug miagi kini sa tunnel.

Matud pa nga nabantayan kini nga nag ekis-ekis ang dagan pagsulod pa lang sa tunnel ug nabangga sa poste dayon nisaka sa gutter ug pagkahuman nalimbuwad. Gikatahong kusog kaayo ang dagan sa maong sakyanan dihang nahitabo ang maong aksidente. Gibuksan na hinuon og balik ang tunnel human nakuha ang sakyanan. (BANAT NEWS)