PB suporta sa pagwagtang sa airport fees sa OFW
CEBU, Philippines – Gisuportahan sa hunta probinsiyal sa Sugbo ang panawagan sa Senado sa pagpahunong sa pagkolekta og P550 nga airport terminal fee sa Manila International Airport Authority (MIAA) sa mga Overseas Filipino Workers (OFWs.
Gipasar sa hunta probinsiyal ang giduso nga resolusyon ni Bokal Thaddeus Jude Durano-Sybico atol sa ilang sesyon niadtong Lunes.
Matud ni Sybico nga 20 ka Senador ang niduso sa Senate Resolution No. 1179 nga nag-awhag sa MIAA sa pag-recall o pag-defer sa implementasyon sa memorandum hangtud nga ang MIAA ug stakeholders makahimo og computer system nga awtomatik nga mag-exempted sa OFWs sa pagbayad sa International Passenger Service Charge (IPSC) o airport terminal fee.
Ang nahisgutang memorandum nasupak sa Section 35 sa Akta Republika 8042 kon ang “The Migrant Workers and Overseas Filipino Act” nga giamendar sa “Akta Republika 10022” nga nag-exempt sa mga migrant workers sa pagbayad og travel tax ug airport fee.
Ang resolusyon nga gipangamahanan ni Senador Aquilino “Koko” Pimentel III nag-awhag sa Senado sa pagpahigayun og inquiry sa implementasyon sa Memorandum Circular No. 8 sa MIAA. – /GMR) (BANAT NEWS)
- Latest
