Tulisan nga mipatay sa sikyu nadakpan

CEBU, Philippines – Nadakpan sa  follow-up operation sa kapolisan  ang  tulisan nga namusil patay sa guwardiya nga mitabang sa babaye nga iyang gitulis diha sa Barangay Poblacion, Lungsod sa Liloan  niadtong Enero 27 sa gabii.

Si Senior Police Officer 4 Octavio dela Paz sa Liloan Police Station miila sa tulisan nga mao si Roy Carlo Apas, 28, taga Sitio Calubihan, Barangay Yati sa nahisgotang lungsod.

Matud pa niya, si Apas maoy gitumbok nga nagpusil patay kang Delo Wagas Mendez, ang guwardiya sa TESDA nga nagpuyo sa Barangay Poblacion sa nahisgotang lungsod.

Nag-angkas sa motorsiklo si Mendez nga gimaneho sa iyang higala nga si Ricardo Alguso Oliva  ug ilang nalabyan sa Barangay Yati ang usa ka babaye nga gitulis sa duha ka lalaking nagsakay og motorsiklo.

Gitabangan nila ni Mendez ug Oliva ang babaye pinaagi sa pagpatid sa motorsiklo sa mga suspetsado hinungdan nga nakadagan ang babaye, apan gikatahong gipusil sila sa mga tulisan nga nakaingon sa kamatayon ni Mendez.

Si Bryan Pitogo nga nagdala sa motorsiklong gisakyan sa namusil nga tulisan daling nadakpan.

Sa laing bahin, usa ka 16-anyos nga batang babaye nga gidudahang maoy nanglungkab sa donation box sa St. John de Sahagun Church ang nadakpan human dunay usa ka babaye ang mireklamong gikawatan usab niini diha sa Barangay Poblacion.

Ang maong dalagita anaa na karon sa Department of Social Welfare and Development -Toledo aron ipailawom sa rehabilitation. – /EIM) (BANAT NEWS)