Usa patay sa bangga sa motorsiklo

CEBU, Philippines – Usa ang patay ug usa sab ang anaa sa talandugon nga kahimtang sa panagbangga sa duha ka motorsiklo sa Tayud, lungsod sa Liloan sa niaging gabii.

Ang namatay naila nga si Hemie Cuhitmingaw, hingkod nga taga Gila-Gila, Compostela samtang ang naangol mao si Alano Lapad, nga taga Tayud, Liloan.

Gumikan sa kakusog sa dagan sa motorsiklo nga giluwanan sa namatay napunggit sab ang motorsiklo nga giluwanan ni Lapad tungod sa kalit nga pagliko niini.

Tungod sa kusog nga impact sa maong panagbangga, si Cuhitmingaw nabunal sa gutter sa karsada nga nakaingon usab sa pagkabuak sa gisul-ob nga helmet niini.

Samtang nalamba ngadto sa karsada uban sa iyang motorsiklo si Lapad nga maoy hinungdan sa grabeng kadaut nga naangkon sa iyang kalawasan.

Gidala sa tambalanan ang duha apan nakabsan gyud sa kinabuhi si Cuhitmingaw. – /GMR) (BANAT NEWS)