Pito rescuers, 3 mananagat naluwas

CEBU, Philippines - Naluwas ang pito ka sakop sa rescue team sa lungsod sa Aloguinsan ug ang amahan ug anak sa dakbayan sa Naga kinsa nakasugat og aksidente sa kadagatan atol sa bagyong Mario

Ang pito nga unang gikataho nga missing naila nga sila si Armilio Flores, 54; Julito Tioc, 40; Orencio Bartiquil, 53; Jay Alcos, 15; Raymundo Adan, 52; Rocky Hubatay, 20; ug usa ka Macoy kinsa nangita unta kang Juanito Alcos, 63, nga usa ka mananagat.

Ang tigpamaba sa Provincial Disaster Risk Reduction and Management Office (PDRRMO) nga si Jules Regner miingon nga ang pito nga kasagaran kaliwat ni Juanito nagsugod pangita kaniya alas 5 sa hapon apan giingong na-missing kini sakay sa duha ka baruto. Ang duha ka baruto nakit-an alas 9  ug alas 11 sa gabii sa kadagatan sa Aloguinsan.

Si Juanito nakit-an gahapon sa alas 5 sa buntag nag utaw-utaw sa kadagatan tunga-tunga sa Asturias ug Balamban nga nag-abay sa salbabida ug daling gidala sa tambalanan.

Matud pa nga niadtong Huwebes sa alas 2:17 sa hapon, ang asawa ni Juanito nga si Adelaida nakadawat og text message gikan sa iyang bana nga nahutdan siya’g gasolina.

Si Adelaida dali nga nakatawag sa Aloguinsan Police Station ug nangayo og tabang.

Samtang ang Naga City Local Disaster Risk Reduction and Management Council ug ang Philippine Coast Guard miluwas usab sa amahan ug anak nga nagpautaw-utaw sa kadagatan dihang mitikyaob ang bangka nga ilang gisakyan.

Si DRRMC Officer Ritche Cabigon miila sa mga naluwas nga sila si Felix Tañan, 61, ug John Louie, 13, taga Lawis, Naga City.

Kadlawon niadtong Huwebes, sila si Felix ug John Louie nanagat human nila makita nga linaw na ang kadagatan.

Pasado alas 6 sa buntag dihang paingon na silang mopauli kalit mikusog ang hangin ug midagko ang bawod hinungdan sa pagtikyaob sa bangka ug nagpautaw-utaw sa kadagatan.

Ang barko nga paingon sa Petronas maoy unang nakakita sa natuwad nga bangka.

Apan naglisud pagluwas ang mga tripulante maong ilang gipahibawo ang PCG.

Pasado ala una sa hapon nakit-an ang amahan ug anak nga dali usab nga gidala sa baybayon ug wala na gidala sa tambalanan human mihukom ang duha nga mouli na lang human makakaon. (Mylen P. Manto ug Decemay P. Padilla/GMR)(BANAT NEWS)