Ubang nasunogan sa Palma di na makabalik

CEBU, Philippines- Dili tanang pamilya nga nasunogan sa sitio Palma, San Roque, dakbayan sa Sugbo ang makabalik pagtukod sa ilang pinuy-anan human sa re-blocking nga himoon.

Matud ni Alvin Santillana, pangulo sa Local Disaster Risk Reduction Management Office, nga ila una ipatuman ang tres metros nga easement sa kilid sa sapa ug butangan og dos metros nga sidewalk sa dili pa patukuran pagbalik og mga panimaye. Nunot niini imposible na nga maigo ang gatosan ka pamilya gumikan kay mogamay na ang lugar.

Gikataho nga 135 ka balay ang nasunog nga may 278 ka pamilya sa niaging semana sa maong lugar.

Hinuon si Santillana miingon nga wala’y angay ikabalaka tungod kay hatagan og segurong relocation site sa laing lugar ang mga dili mahiluna pagbalik sa dapit.

Matud ni Bise Mayor Edgardo Labella nga andam mohatag ang kagamhanan sa dakbayan sa Sugbo og hinabang pinansiyal sa mga nasunogan apil na ang mga renters sa lugar.

Ang konseho gikatakdang mopasar og resolusyon nga magdeklarar sa lugar ubos sa state of calamity aron mapagawas ang budget. - /GMR) (BANAT NEWS)