Karsada atubangan sa USC-Talamban gipalapdan na
CEBU, Philippines - Gilauman nga makatabang pagpahapsay sa trapiko dapit sa Talamban ang pagpalapad na sa karsada atubangan sa University of San Carlos (USC)-Talamban Campus.
Giguba na pagsugod ang koral nga semento atubangan sa USC-Talamban Campus aron kini isibog og mga duha ka metros base sa awhag ni Mayor Michael Rama.
Matud ni Cerwin Eviota, media liaison officer sa USC, nga ang kaparian nga nagdumala sa tunghaan miuyon nga isibog ang ilang koral bisan og wala pay nasabotan nga presyo sa pagbayad sa ilang yuta.
Si Eviota miingon nga ang tagdumala sa USC nagpakabana g’yud nga masulbad na ang grabe’ng problema sa trapiko diha sa Governor Mariano Cuenco Avenue, ang naila nga Banilad-Talamban Road. Gipahibalo na hinuon ni Kongresista Raul Del Mar nga aduna nay budget nga P150 milyones gikan sa DPWH aron pagpalapad sa karsada sa mao nga dapit. (BANAT NEWS)
- Latest
