Anak nagmaoy gipatay sa papa

CEBU, Philippines - Gipatay sa 69-anyos nga mag-uuma ang iyang anak kay nagmaoy ug nagpataka na lang pagpanion og armas atol sa birthday party sa iyang manghod didto sa Barangay Tangub, lungsod sa Pinamungajan kaniadto’ng Miyerkules sa gabii.

Sa wala pa hansaki og plamingko ni Cristituto Songahid ang dughan sa 41-anyos niya nga anak nga si Renato, ang amahan nagkurog sa kalisang kay ang nagmaoy niya nga anak mition kaniya og 38 kalibre nga revolver ug mikablit kapila ka higayon apan wala makabuto.

Base sa imbestigasyon sa kapolisan nga si Renato, usa ka construction worker nga nagpuyo sa Angilan, Aloguinsan apan miadto sa balay sa iyang amahan aron pagtambong sa birthday party sa iyang manghod nga babaye nga nag-18 anyos na. Si PO3 Marciano Suarez Jr. sa Pinamungajan Police Station nagkanayon nga si Renato nakig-inom uban sa mga bisita ug diha nga nahubog na nagmaoy ug nanghagit na og sukmagay, apil sa iyang mga paryente samtang nagwara-wara og revolver. Ang mga bisita pwerte’ng nakadagan tungod sa kahadlok. Ang inahan ni Renato nga si Pablita miduol ug mitambag nga dili maghinubog ang iyang anak apan gituok hinuon siya mao nga nangayo’g tabang.

Ang amahan ni Renato nga si Cristituto dali nga miduol ug gibadlong ang iyang anak aron mohunong na sa pagpanghasi apan gitionan hinuon siya’g armas ug gikablit g’yud sa makapila ka higayon.

Tungod sa kakuyaw ug kalagot sa amahan, mikuha siya’g plamingko nga 12 pulgadas ang gitas-on ug gihansakan ang dughan sa iyang anak. Nasayran nga wala diay bala ang armas ni Renato mao nga wala makabuto. Ang plamingko nga iyang gigamit pagpatay ni Renato mao usab ang giihaw sa baboy nga gikomberahan sa mga bisita.  (BANAT NEWS)