Sex video ug tuba nakaagni pagpanglugos

CEBU, Philippines - Ang pagtan-aw og “sex video” maoy nakatukmod sa 17-anyos nga batan-on aron lugoson niya ang kuwatro-anyos nga bata’ng babaye didto sa Barangay Salag-maya, lungsod sa Alcantara.

Samtang nagtan-aw sila’g sex video ug ang iyang uyoan, nagkalingaw usab sila pag-inom og tuba.

Gipasakaan na hinuon og kaso nga rape ang naglugos sa biktima ug gitanggong na karon sa bilanggoan sa Alcantara Police Station, matud ni PO3 Nestor Tonilon.

Base sa pakisusi nga gihimo sa mga doktor sa Vicente Sotto Memorial Medical Center (VSMMC), wala sila’y nakita nga “laceration” sa pribado’ng parte sa iyang lawas apan maisip gihapon nga rape ang gihimo            kaniya.

Sa gihimo nga psychological ug physical examination aduna g’yuy basehanan nga kapasakaan og kaso ang bayong-bayong. Gani ang kadagkoan sa Department of  Social Welfare and Development (DSWD) gikataho nga miisyu na og certificate of discernment nga nagmatuod nga anaa sa tukma nga panghuna-huna ang suspek paghimo niya sa salaod.

Nagtuo si Tonilon nga nayawaan ang panghuna-huna sa batan-on tungod sa iyang nainom nga tuba ug sa nakita niya sa sex video.  “Mura’g agi g’yud kadto sa sex video nga gipatan-aw sa uyoan diha sa cellphone, unya nahubog na agi sa tuba, murag iya natripan ang bata,” dugang ni PO3 Tonilon.

Samtang sa lungsod sa Naga, nasikop sab sa kapolisan ang 17-anyos nga lalaki human sa pipila ka bulan nga pagtago-tago tungod ‘sab sa kaso nga rape nga gipasaka sa 14-anyos nga babaye nga iya ra ‘sab nga paryente.

Ang pagpanglugos giingon nga didto nahitabo sa Sitio Balisong, Barangay Cantao-an, dakbayan sa Naga.

Si PO3 Francisco Codinera Jr. miingon nga ila dayon nga gipangita ang suspek human sa maong pagpanglugos apan abtik kini nga nakasibat. Ang kapolisan nakadawat og inpormasyon nga didto ra diay sa lungsod sa Minglanilla nagtago ang suspek.

Human madakpi, ang suspek kusganon nga nanghimakak nga gilugos niya ang 14-anyos kay matud niya sinabotan nila ang nahitabo. Sa pagkakaron, ang suspek anaa na sa Operation   Second Chance sa Barangay Kalunasan samtang nagpaabot sa paghusay sa iyang kaso sa hukmanan. - /RUB (BANAT NEWS)