Buhisan gibakwi-an pagka-drug free barangay
CEBU, Philippines - Ang mga kawani sa Barangay Buhisan, dakbayan sa Sugbo wala na karon giisip nga “drug free†human nga adunay usa kanila nga napositibo sa shabu diha nga gibalikan kini’g himo og random drug testing kaniadtong Biyernes.
Diha nga ang mga opisyal ug kawani sa Barangay Buhisan gihimoan og kinalit nga drug test mga duha ka buwan ang milabay, wala’y bisan usa kanila nga napositibo sa gidili nga matang sa drugas.
Ang mga tawo nga mohunong paggamit og shabu sulod sa tulo ka adlaw gikataho nga dili na mapositibo sa drug test. Nahukman sa mga sakop sa City Office for Substance-Abuse Prevention (COSAP) nga balikan nila ang Buhisan paghimo og random drug test.
Matud ni COSAP Chief Alice Utlang nga pito ka kawani ang ilang gihimoan og random drug test kay kadudahan ang ilang mga linihokan ug wala mosipyat, usa g’yud kanila ang napositibo.
Si Utlang miingon nga depende na sa mga opisyal sa Barangay Buhisan kun unsa ang ilang himuon sa mao nga kawani nga nahibaw-an na nga adik sa shabu.
Pagka karon, ang mga barangay kang kansang mga opisyal ug kawani nagpabilin nga drug free mao ang Taptap, Agsungot, Pulangbato, Lusaran, Tabunan, Budlaan ug ang Talamban.
Pipila ka adlaw gikan karon, ang COSAP mohimo na usab og random drug test sa mga barangay nga gideklarar nga drug free ang mga kawani. (BANAT NEWS)
- Latest
