Duha ka tindahan gironda sa NBI tungod sa gi-ban nga slimming pills

CEBU, Philippines - Gironda sa mga sakop sa National Bureau of Investigation (NBI)-7 ang duha ka tindahan sa downtown area sa dakbayan sa Sugbo kagahapon tungod sa pagpamaligya og gi-ban ug unregistered nga mga slimming products.

Kauban sa NBI ang mga representante sa Department of Health (DOH) nga naggikan sa ilang Regional Health Office ug Food and Drugs Administration.

Si NBI-7 Regional Director Atty. Max Salvador nagkanayon nga sud sa usa ka buwan nga ilang gi-surveillance ang maong tindahan una pa sila mikuha og search warrant sa korte nga giluwatan ni Regional Trial Court Judge Gilbert Moises sa  Branch 18 niadtong Miyerkules.

Matud pa niya nga dunay request nga nadawat sa ilang buhatan kalabot sa banned items nga gipamaligya karun sa mga tindahan nga wala mag-agi sa Food and Drug Administration (FDA) nga makadaut sa panglawas.

Si Atty. Donaver Inesin, ang lead agent sa operasyon nagkanayon nga ang subject sa search warrant mao ang Beauty Shape Cosmetic sa dalan Sanciangko Street nga giingong gipanag-iya sa usa ka Maricar Panerio nagbaligya og Hokkaido Slimming Pills, usa ka unregistered slimming pills. Nasakmit sa maong tindahan ang onse ka boxes sa Hokkaido Slimming Pills nga nagkantidad og P175 kada box ug laing banned products sa FDA.

Sa laing establisamento nga gironda mao ang  Yu Lian Merchandizing sa Pelaez St., sa eskina V. Gullas St. nga nasakmitan og 100 ka small boxes nga Hokkaido Slimming Pills, 20 boxes sa Pearl White Slimming Capsule, tulo ka boxes nga Perfect Figure Slimming capsule, 51 boxes nga Leisure 18 Slimming Coffee ug lima ka boxes nga Slimming Beauty capsule.

Usa ka lalaki nga nagtrabaho sud sa Yu Liam Merchandizing, (kinsa nagdumili pagluwat sa iyang pangalan) miingon sa media nga wala siya makahibalo nga unregistered products ang ilang gibaligya.

Ang mga banned products tungod kay makadaot sa panglawas mao naglakip usab sa Ballet Dancer Fat Reducing, Bio-Lissoen Fat Reducing, Cell Life Slimming Coffee, Qi Xian Nu, Elegant Shape Fat Reducing, Seven Days Miracle, Goodliness Fat Reducing, Happyslim, Lightness Fat Reducing, Maggie Fitness Essence, Mei Shen Ling Anti Obesity, Perfect Figure Slimming, Pill for Weight Reduction, Pretty Model, Perfect Slim ug Quiaomei Fat Binder,  base sa sertipikasyon nga gipagawas sa DOH.

Matud ni Inesin ang DOH mipasidaan nga ang paggamit sa maong produkto makaapektar sa utok sama sa cerebral hemorrhage, hypertension, non-fatal stroke, non-fatal heart attack o ba kaha mamatay gyud ang mogamit niini, extreme fever, rapid muscle breakdown, psychosis (makabuang), tremor ug uban pa. Duha ka mga Chinese nationals ang giimbitar sa NBI alang sa mga pagpangutana bahin sa maong mga produkto.

Matud sa NBI nga ang maong tindahan, nakalapas sa Republic Act 3720 as amended by Executive Order No. 175 otherwise known as Foods, Drugs and Devices and Cosmetics Act. (BANAT NEWS)