Mga sundalo mitabang sa Brigada Eskwela

CEBU, Philippines - Ang Brigada Eskwela didto sa mga tunghaan sa dakbayan sa Lapu-Lapu kagahapon giabagan sa mga sakop sa Philippine Air Force (PAF), ug Naval Forces Central.

Matud ni Lapu-Lapu City Police Office (LLCPO) chief Armando Radoc nga gawas sa pagpakatap sa iyang mga sakop sa lainlaing tunghaan adunay team ang Lapu-Lapu PNP nga giandam aron moresponde kun may mga tunghaan nga magkinahanglan sa ilang tabang. Kini sama sa pag-repair sa mga nangaguba nga kagamitan nga mahimo pa nga ayuhon ug ang pagpanglimpyo sa palibot sa tunghaan.

Si Radoc miingon nga gawas sa luwas nga kahimtang sa kabataan nga malayo sa disgrasya ug dautang elemento kinahanglan nga luwas usab ang mga estudyante sa sakit nga makuha gikan sa hugaw nga palibot. "The PNP has also its moral obligations to the community as well as the children," matud sa hepe. Gikahinangop usab ni Radoc kay adunay mga sakop sa PAF ug Naval Forces Central nga miabag sa mga tunghaan diin ang ilang kabataan nagtungha ug ang uban boluntaryo nga misalmot sa Brigada Eskwela.

Kadagkoan sa DepEd sa Lapu-Lapu mihulagway nga malampuson ang ilang Brigada Eskwela tungod sa kooperasyon nga gipakita sa mga ginikanan. (/RUB)(BANAT NEWS)