Nagmotor napasok sa bus ug naguyod og pipila ka metros
CEBU, Philippines - Lalaki nga nagsakay og motorsiklo namatay human siya nabanggaan og mini-bus didto sa national highway sa Barangay Magay, Compostela kaniadtong Domingo sa gabii.
Si Benjie Quimbo, 27, ulitawo ug taga Sitio Tuburan, Barangay Cambayog, Compostela, gideklarar nga patay na’ng daan sa pag-abot sa ospital.
Matud sa report nga human mabanggai sa bus ang motorsiklo ni Quimbo, ang biktima napasok pa gayud sa ilawom sa sakyanan ug nabagnod pa kini og pipila ka metros.
Ang bus nga nakadam-ag ni Quimbo gimaneho ni Andres Gomez Jr., 61, ug lumad nga taga Poblacion Carmen. Matud ni SPO3 Ernesto Pepito sa Compostela Police Station nga paingon sa Danao ang bus samtang kasugat niya ang motorsiklo.
Giingon nga kalit lang nawad-an og control ang nagmaneho sa motorsiklo ug mideritso sa mini bus.
Maayo nga pagkapasok sa drayber ngadto sa mini bus ug nakaangkon kini og grabeng mga bali ug bun-og sa kalawasan.
Dali unta nga gidala sa Chong Hua Hospital ang biktima apan gideklarar kini nga patay na. Nag-imbestigar pa ang kapolisan samtang misurender ang drayber sa bus ug kasamtangan kini nga gitanggong sa Compostela Police Station jail. (/RUB)(BANAT NEWS)
- Latest
