Mga traysikol drayber nga dili mohatod og pasahero silotan
CEBU, Philippines - Si Lapu-Lapu City Mayor Paz Radaza mibahad nga iyang pasilotan ang mga drayber og traysikol nga dili mohatod og pasahero sa ilang destinasyon.
Gihimo ni Radaza ang bahad human siya makadawat og reklamo gikan sa mga sumasakay nga adunay mga drayber og traysikol nga dili na mulahos paghatod sa ilang pasahero gikan sa Marigondon padulong sa Basak ug gikan sa Gun-ob ngadto sa Basak gumikan sa grabe’ng traffic tungod sa nagpadayong pagsemento sa karsada nga gihimo sa DPWH.
Matud ni Radaza nga iyang ipatawag ang mga opisyal sa lainlaing kahugpongan sa drayber ug traysikol nga nagbiyahe sa maong rota aron sila pasidan-an nga kinahanglan ilang ihatod ang mga pasahero sa ilang destinasyon.
Ang mayor miingon nga kung adunay mosupak mapugos siya pagdili na sa mga traysikol nga moagi sa Highway Basak aron ang mga drayber madisiplina.
Manduan usab ni Mayor Radaza si City Legal Officer Yuri Binluan sa pagkanselar sa prangkisa sa mga traysikol nga ang mga drayber supakero. (BANAT NEWS)
- Latest
