Unang adlaw sa filing sa COC malinawon-PRO-7

CEBU, Philippines — Wala'y natala nga mga kakulian ang Police Regional Office(PRO)-7 sa unang adlaw sa filing sa Certificate of Candidacy sa tibuok rehiyon kagahapong adlawa sumala pa ni Police Lieutenant Colonel Gerard Ace Pelare.

Si Pelare, tigpamaba ni PRO-7 Regional Director Brigadier General Anthony Aberin nga naka heightened alert sila sugod kagahapon diin daghang polis ang gipakatap sa mga buhatan sa Comelec aron masiguro ang malinawon ug hapsay nga kalihukan.

Gipangusgan sab sa kadalanan ang checkpoints matag karon ug unya aron luwas  ang mga nagtinguhang magpapili sa midterm election sunod tuig inig adto nila sa Comelec offices aron pagduso sa ilang COCs.

Gilauman nga sa Oktubre 8, katapusang adlaw sa filing COC modagsa ang mga mo-file sa ilang COC ug usa kini sa bantayan sa kapulisan.

Sama sa gibuhat nila kaniadto kun mahuman na ang filing sa COC ang PRO-7 mosusi sa mga kandidato kun duna ba silay mga paryente nga police nga nadestino sa dapit kun asa kini magpapili sa umaabot ng eleksyon aron sila ibalhin sa laing lugar aron dili maka impluwensiya sa mga botante.

Gipahinumduman sab pagbalik ang kapulisan sa Central Visayas nga dili magpagamit sa politika, walay dapigan sanglit ang trabaho nila mao ang pagpatunhay sa kahapsay ug kalinaw sa umaabot nga eleksyon. --  IBM BANAT NEWS