Duha patay tungod sa bikil samtang nakig-inom

CEBU, Philippines - Gumikan sa kahubog duha ka mga lalaki ang nangamatay tungod sa panagbingkil nila sa ilang mga gikainom sa managlahing dapit ug higayon.

Wala na nadala pa sa tambalanan ug nakabsan sa iyang kinabuhi ang mag-uuma nga si Renier Inosolango, 27, taga Sitio Laguna, Lunas, Asturias dihang kini gidunggab sa iyang silingan nga si Joseph Rey Rebalde, 25.

Matud pa ni SPO3 Dennis Nocos, ang luyo-luyong hepe sa Asturias Police Station nga nag-inom ang duha diha sa Sitio Trese, Barangay Lunas  dihang nagkalalis ang duha tungod sa kahubog. Gikatahong milakaw ang suspek apan mibalik ug diretsong mipusil  sa paa sa biktima.

Sumala pa ni SPO3 Nocos naigo ang bukog sa paa sa biktima ug gituohang naapil usab kaigo ang dakong ugat niini hinungdan sa pagsugwak sa dugo, nga meresulta sa iyang kamatayon.

“Lose of blood ang hinungdan sa iyang kamatayon, remote area man gud na nga barangay sir, nadugayan og dala sa hospital,” matud pa ni Nocos nga nahinabi sa Banat News.

Ang suspek padayon pang gipangita sa kapolisan human dali kining nakasakay og bus.

Samtang laing hubog usab ang namatay nga nagbinawsanay og dunggab diha sa barangay Balisong sa lungsod sa Argao.

Patay na nga nadangat sa Kintanar Memorial District Hospital ang usa ka Jessie Adlawan, 27, human gidunggab sa silingang si Felix Balucos, 54.

Matud pa ni PO2 Renato Nacaytuna sa Argao Police Station nga dihang nangahubog ang duha nagkabingkil sila ug naglalis. Matud pa gidunggab ni Adlawan si Balucos sa wala nga bahin sa abaga ug sa tiyan.

Apan misukol si Balucos ug gilayog si Adlawan hangtod nga nakuha niini ang kutsilyo ug gibawsan kini sa pagdunggab sa lusong-lusong.

Ang duha parehong gidala sa maong tambalanan apan  namatay gyud si Adlawan. Si Balucos gikatakdang pasakaan og kaso tungod sa maong hitabo. (/EIM)(BANAT NEWS)