Daghan nang buot moimbestigar bahin sa gi-plasteran nga masuso

CEBU, Philippines -  Daghan nang ahensya sa gobiyerno ang interesado sa pagsusi sa kaso sa usa ka bag-ong natawo nga bata nga giingong giplasteran ang baba tungod sa pagsige niini og hilak.  Gipahibawo sa Philippine Regulatory Commission (PRC) nga mahimong mopasaka og kaso ang ginikanan batok sa nurse o medical personnel nga mihimo niini.

Matud ni Atty. Roselyn Soria, legal hearing officer sa PRC, nga isip quasi judicial body mahimo silang makahusay sa kaso, apan kinahanglan nga mopasaka’g reklamo ang ginikanan sa bata. Samtang ang Department of Social Welfare and Development (DSWD) sa ilang bahin miingon ila unang i-asses ang panginahanglan sa inahan sa bata.

Matud sa DSWD nga kung basehan ang nakuhang hulagway sa bata nga may plaster ang baba, dako na kining kalapasan. Samtang gisugdan na sa Cebu Puericulture Center and Maternity House Inc. (Maternity hospital) ang ilang imbestigasyon ug misaad nga ilang palawman ang pakisusi sa maong insidente.

Gawas sa maong tambalanan, ug DOH-7 ang Commission on Human Rights (CHR-7) nihimo usab og ilang linaing imbestigasyon labot sa gikataho nga pagplaster sa nurse sa maong tambalanan sa baba sa bata nga bag-ong natawo. Kagahapong adlawa, ang mga imbestigador sa CHR-7 nga sila si Lelibeth Lluna ug Primo Cadampog nibisita sa buhatan sa Maternity hospital ug nipahigayon sa ilang inisyal ug informal nga imbestigasyon.

Si Lluna nga nahinabi sa mga sakop sa media nagkanayon nga ilang gisusi ang maong report pinaagi sa pagpakighinabi sa nurse ug sa mga opisyal sa naasoy nga hospital. Iya usab nga gipahibawo nga magkinahanglan sila og gipanumpaang pamahayag sa mga ginikanan sa bata. Kagahapon nakagawas na ang maong bata gikan sa maong tambalanan.  (BANAT NEWS)