El Niño posibleng molanat og usa ka tuig–PAGASA

CEBU, Philippines - Matud sa Philippine Atmospheric, Geophysical and Astronomical Services Administration (PAG-ASA) dako kaayo ang tsansa nga mabatyagan ang El Niño karong Hunyo ug posibleng molanat kini og usa ka tuig.

“Kun ang prediction sa una is 50-50 chance of El Niño, karon above 50 percent na gyud ang chance,” sigon ni Alfredo “Al” Quiblat Jr.  chief sa PAG-ASA Mactan Meteorological officer.

Saysay ni Quiblat nga angay magpakabana ang katawhan sa mga pahimangno sa tinugyanan sa panahon aron mamenusan ang epekto niini. Nakatala ang PAG-ASA kagahapon og 32.3 degrees Celsius nga temperature ug posibleng mas moinit pa kini karong bulana ilabi na sa ikatulo nga semana.

Matud ni Quiblat, bisan og aduna’y prediksyon sa El Niño, aduna gihapon maabot nga daklit ug panagsang pagbunok sa uwan sa pipila ka mga dapit.

Gipahimangnoan ang katawhan nga di magpalabi sa pagpabuwad sa adlaw tungod sa peligro sa heat stroke.

Matud niya posible usab nga magnihit ang supply sa tubig, apan  ang Metropolitan Cebu Water District mipasalig nga dili magkuwang ang supply sa tubig sa Sugbo.

Samtang si Cebu Provincial Governor Hilario Davide III mibutyag nga andam na ang probinsya sa umaabot nga huwaw pinaagi sa Provincial Environment and Natural Resources Office (PENRO) aron mamenusan ang epekto niini ngadto sa mga mag-uuma. Ang mga DA personnel ug veterinarians moadto sa mga mag-uuma aron sa pagtudlo sa mga angay buhaton panahon sa ting-init. (Jean Marvette A. Demecillo ug Analuz Abing,CNU Intern/EIM)

Milungkab sa awto sa PRO7 chief nakuhaa’g video

Duna nay suspek ang kapolisan sa paglungkab sa sakyanan sa Regional Director sa Police Regional Office 7 nga si Chief Supt. Danilo Constantino base sa mga pamahayag sa saksi ug sa nakita sa closed circuit television footage. Sumala pa ni Constantino nga nahimuot ra siya sa dagan sa imbestigasyon sa pagbuak sa windshield sa iyang sakyanan ug sa pagkuha sa bag sa iyang asawa.

Si Sr. Supt. Armando Radoc, ang hepe sa Lapu-Lapu City Police Office nga nahinabi sa mga tigbalita miingon nga duna na silay suspek sa maong hitabo.

Miingon si Radoc nga sumala sa pamahayag sa duha ka saksi ug sa kuha sa CCTV malagmit duha ngadto sa tulo ka tawo ang nibuhat niini. Gipakita sab ni Radoc sa mga sakop sa media ang cctv footage nga nakuha nila sa usa sa mga establisamento duol sa maong restaurant diin nakuha ang duha ka lalaki nga naglakaw sa dalan nga ang usa nagdala og itom nga bag nga susama sa bag sa asawa sa regional director. Ang duha mangaon lang unta sa maong restaurant tungod kay padulong na sila magsaulog sa ilang wedding anniversary.

Ang maong bag gikatahong may sulod nga tulo ka cellphones usa ka Ipad ug P12 mil nga salapi.  (BANAT NEWS)