Rama nalutsa’g warrant, nipiyansa

CEBU, Philippines — Gibutyag ni kanhi Cebu City mayor Michael Rama nga nalutsan gyud siya og warrant of arrest may kalambigitan sa iyang kasong nepotismo.

Ang nepotismo dili kini usa ka criminal case apan gikarga kini isip usa ka paglapas sa Republic Act 1319 o ang Anti-Graft and Corrupt Practices Act.

Si Rama nagkanayon nga nasayran sa iyang kampo nga dunay  electronic warrant of arrest nga pinetsahan niadtong Marso 11, 2025 nga gikan sa San Carlos City, Negros Oriental nga gipagawas batok kaniya.

Human niya nadawat ang maong warrant, matud pa niya nga gi-monitor kini niya pag-ayo gumikan kay bisan asa pa siya nga moadto, dako gyud og posibilidad nga maposasan siya.

“I did my piano, but in silence,” matud pa ni Rama kinsa mibutyag nga nakabutang na siya og piyansa nga P270,000 sa Cebu City Court.

Giunhan niya ang mga otoridad samtang nga wala pa makahupot og warrant ang mga otoridad.

Gipasabot sab ni Atty. Collin Rosell kun nganong sa San Carlos City naggikan ang maong warrant of arrest.

Matud pa niya nga kung usa ka opisyal sa gobyerno ang nalutsan og warrant of arrest dili kini iisyu sa lugar o korte kun taga asa sila.

Kinahanglan nga ma-isyu kini sa laing hurisdiksiyon nga dili niya sakop ug sa kaso ni Rama wala kini giisyu sa Dakbayan sa Sugbo kondili didto sa San Carlos City.

“Ang warrant karon online na, ang kuyaw lang kay ang tanan tao nga naa sa law enforcement makahibawo sa imong warrant,” pagpasabot pa ni Rosell.

Bugtong pangutana ni Rama mao ang “when will this persecution end?” kun diin molanat na sa usa ka tuig ang iyang pag-atubang sa maong sama nga kaso kun diin napaubos na siya og suspenso hangtud nga nisangpot kini sa perpetually disqualification.

Bisan pa man sa mga panghitabo sa sa kinabuhi ni Rama sa politika, gihimug-atan ni Rama nga ang kamatayon ra ang makapahunong sa iyang kandidatura pagkamayor. —IBM BANAT NEWS