SKF President namusil

CEBU, Philippines — Gidakop sa kapolisan ang  Sangguniang Kabataan(SK) Federation President sa Lungsod sa Argao human kini maoy gitumbok nga mipusil patay sa usa ka batan-on nga uyab sa nakarelasyon sa suspek diha sa usa ka restobar sa Don Gil, Barangay Poblacion, Lungsod sa Argao niadtong Biyernes sa gabii, Hulyo 11, 2025.

Ang biktima mao si Angelo Amarillo, 23,  taga Barangay Poblacion sa maong Lungsod samtang ang suspek mao si Mark Alphonsus Villamora, 21, SK Federation President sa Lungsod sa Argao ug SK Chairman sa Barangay Lamacan sa maong lungsod. Nagkanayon si Police Captain Carlos Narca, Deputy Chief sa Argao Police Station nga ang biktima ug suspetsado sa miaging tuig pa nagkabangi gumikan sa love triangle.

Managhigala ang duha apan niaslom ang ilahang panaghigalaay tungod sa usa ka babaye nga usa sab ka opisyal sa kabataan.

 Sigon ni Narca nagselos ang biktima kay nahibaw-an niini nga nagkarelasyon ang iyang uyab ug ang suspek nga niresulta sa ilang pagbinaharay nga kun mag-abot silang duha magpinusilay gyud sila.

Matud pa ni Narca naay report nga namabdos ang uyab sa biktima ug wala mahibaw-i kun kinsa ang amahan sa bata.

"Diretso ra, naa naman to daan ang biktima didto, naka table naman sa usa ka lamesa tungod anang naay banda-banda ba, siyempre ang katong suspek niabot didto nangita pud siya og table kay kuan man gud ng lugara suroyanan ba, pagpangita niya og table nakit-an man niya didto ang biktima nga naa sa table didto nahitabo ng pinusilay didto," sigon ni Narca.

Kuyog sa biktima adtong higayona iyahang mga barkada.  Gikataho nga armado og kalibre .9mm pistol ang suspek nga mao say gigamit sa pagpusil sa ulo ug ubang parte sa lawas sa biktima.

Dunay Licensed to Own and Posses Firearms ang suspek apan wala kini Permit To Carry Firearms Outside Residence.

Human mahitabo ang insidente nisibat dayon ang suspek apan nasugatan kini sa mga nirespondeng mga polis nga nakadungog sa butobuto sa armas.

Ang biktima gidala sa mga sakop sa Argao Municipal Disaster Risk Reduction and Management Office sa Isidro C. Kintanar Memorial Hospital apan gideklarar kining dead-on-arrival sa nag-atiman nga doktor.  Na-recover sa kapulisan sa crime scene ang siyam ka basiyo sa bala ug duha nikagar nga balas, usa ka deformed slug ug usa ka fragment.

Ang suspek nagtingkagol karon sa prisuhan sa Argao Police Station ug pasakaan kini og kasong murder.  IBM  BANAT NEWS