Suspek sa ambush nadakpan
CEBU, Philippines — Duha ka mga tawo ang gidakop sa hot pursuit operation sa Tabogon Municipal Police Station, Provincial Intelligence Unit Cebu Police Provincial Office ug Mambaling Police Station 11 Cebu City Police Office ang duha sa tulo ka mga suspetsado sa pagpusil patay sa usa ka negosyante nga tag-iya og hardware ug construction supplies niadtong Lunes sa buntag, sa Sitio Lamac, Barangay Ilihan, Lungsod sa Tabogon.
Ang mga suspetsado mao sila si alyas Rodel, 21, ug alyas Vicente, 43, nga parehong taga Sitio Ipil-Ipil, Alaska, Barangay Mambaling. Silang duha nadakpan niadtong Lunes sa gabii, Marso 31, 2025.
Ang duha gidudahang nalambigit sa pagbanhig kang Dionisio Montejo Dosdos Jr., 51, nagpuyo sa Barangay Managase, Lungsod sa Borbon ug tag-iya sa Dendonz Hardware and Construction Supply niadtong Lunes sa buntag.
Padung na unta molakaw ang biktima sakay sa iyang sakyanan gikan sa iyang tindahan sa dihang giduol sa mga lalaking nagsakay og itom nga Honda Click nga motor nga nagpakaaron ingnong kustomer ug nangutana.
Apan kalit gipusil sa maong mga lalaki ang biktima gamit ang kalibre .45 nga armas, gani bisan nahagba na kini gitiwasan gyud kini nga nakaingon sa iyang kamatayon.,
Dali dayong misibat ang mga suspetsado paingon sa Norte nga direksyon. Ang kapulisan sa Tabogon Municipal Police Station nihimo dayon og makuting imbestigasyon pinaagi sa pagsubay sa mga CCTV footages ug mao kini ang naghatag kanila og giya.
Na-trace ang motor pinaagi sa Land Transportation Office(LTO)-7 ug nailhan kinsay tag-iya sa motorsiklo nga nagtumbok kang Rodel nga taga Mambaling.
Pinaagi sa Mambaling Police Station naaresto kini. Gikataho nga si Rodel maoy tagiya sa motor apan iyaha kining gipahuwaman kang Vicente nianang adlawa.
Sa pagdakop sa mga suspetsado na-recover sa kapulisan kang alyas Rodel ang motorsiklo ug kalibre .45 nga armas nga gidudahang maoy gigamit sa krimen samtang nakuha gikan kang alyas Vicente ang Mitsubishi color gray, duha ka handheld radios ug gun case nga puwa.
Padayon nga nakig-alayon ang kapulisan sa pamilya sa biktima aron masuta kun unsay posibleng motibo nga gipatay kini.Wala sab mohunong ang kapulisan aa ilang operasyon aron madakpan ang gunman. —IBM BANAT NEWS
- Latest
