Zoning ordinance tukion pagbalik

CEBU, Philippines — Bisan pa sa ilang naunang desisyon nga ipa-defer, gipadayon na karon sa Cebu City Council ang final deliberation sa Comprehensive Revision sa Zoning Ordinance, usa sa pinakadakong legislative measures sa konseho sa dili pa matapos ang ilang termino.

Giaprobahan na kini sa second reading ug gikatakda na nga hisgutan sa final deliberation karong Miyerkules, nga posibleng moresulta sa pinal nga pag-apruba sa maong ordinansa.

Matud ni outgoing Councilor Jocelyn Pesquera, Majority Floor Leader sa Konseho ug proponent sa ordinansa, kaniadto iyang gi-rekomendar nga ipa-defer ang pagduso niini atol sa public hearing, human nga pipila pa ka mga pangutana ug clarification ang nigawas bahin sa detalye sa ordinansa.

Apan, sa usa ka interview sa The Freeman/Banat News kagahapon (Domingo), miingon si Pesquera nga ilang gihukman nga ipadayon ang proseso ug i-“put everything in motion” padulong sa final deliberation.

Matud niya iyaha ng gibasa ug gi-review pag-ayo ang 150 ka panid nga dokumento nga gilakip sa ordinansa ug gilakip usab ang mga feedback nga nigikan sa publiko atol sa hearing.

Gipasabot niya nga ang tuyo sa ordinansa mao ang pagklaro sa zoning o land-use classifications sa dakbayan. Matud niya, kun wala’y revision, magpadayon ang kalibog kun ngano nga tugotan ang uban pang kalamboan nga mo-operate sulod sa residential nga mga lugar.

Kini tungod kay daghan ang nangutana kun ngano dunay mga yuta nga gigamit alang sa industrial purposes nga naa man unta ni sa residential areas.

Ang kasamtangang zoning ordinance nahimong “catch-all” nga klase diin nga walay klaro nga gi-state kung unsa ang gitugot nga paggamit sa usa ka klase sa yuta.

Gihimong sanglitanan ni Pesquera nga ubos sa residential classification, naka-state nga “allow all activities,” apan dunay mga nagtukod og mga commercial buildings.

“Which should not be. Kay naa man nay mga principal uses, accessory uses, allowable uses…at least karon, ila ng na correct,” dugang niya.

Sa miaging public hearing, samtang adunay mga rekomendasyon alang sa pag-revise sa ordinansa, ang Carbohanong Alyansa sa Carbon Public Market mipagawas ug mga kabalaka, ilabi na sa kakuwang sa usa ka formally adopted Comprehensive Land Use Plan (CLUP).

Sa samang hearing, giingon ni Anna Marie Ariosa, pangulo sa Carbohanong Alyansa, nga ang revised CLUP sa Cebu City para sa tuig 2023 hangtod 2032 wala pa gyud naaprubahan o gi-ratify sa konseho.

Nibutyag sab sila sa ilang kabalaka sa timing sa hearing, kay nahitabo kini sa katapusang mga semana sa outgoing administration, samtang duol na ang pagsugod sa bag-ong administrasyon.

Kini nga mga komentaryo gihulagway ni Pesquera nga usa ka “insulto” sa kasamtangang mga konsehal. Bisan pa niini, miingon siya nga nakigkita siya sa mga lider sa Carbon Vendors niadtong Martes.

Matud pa niya kasabot siya sa kabalaka sa mga vendors, nga nagduda nga basin mosaka ang abang sa ilang mga pwesto tungod sa commercial zoning, ilabi na kay ikatulo nga partido ang mag-operate sa maong pasilidad.

Gipaniguro niya nga ang yuta sa Carbon Market nagpabiling gipanag-iya sa Cebu City Government. Apan sa umaabot, ang bag-ong building sa lugar posibleng ipangalan sa JV Corporation, nga partner sa siyudad nga ubos gihapon sa mga regulasyon.

Sumala pa niya, ang uban pang kabalaka ang sunod na nga mayor ang moatiman.

Sumala pa ni Pesquera nga ang zoning ordinance usa ka collective decision sa tibuok konseho, nga gisuportahan sab ni Archival ug acting Mayor Donaldo Hontiveros. — /IBM (BANAT NEWS)