Mga biktima sa sunog sa karsada ra mangatulog

CEBU, Philippines - Daghang pamilya nga wala kahatagi og mga tulda sa kagamhanan sa dakbayan ang nangatulog lang sa karsada human mabiktima sa sunog sa Barangay Lorega-San Miguel.

Ang pangindahay sa mga nasunogan nga hatagan unta dayon sila sa dakbayan sa Sugbo og construction materials aron makasugod na sila pagtukod pagbalik og panimalay.

Ang usa ka bahin sa Imus Road wala paagii og sakyanan kay anaa gibutang ang mga tulda nga giukopahan sa mga nasunogan.

Nagpasalamat hinoon ang mga biktima sa sunog nga walay uwan kay aron dili mosamot ang ilang pag-antos.

Si SFO3 Roylin Maratas, chief investigator sa Cebu City Fire Department, miingon nga lima ka tawo nga naangol sa maong sunog.

Ang nakaangkon og mga samad sa ilang tiil ug kamot mao sila si Raymond Ceñiza, 28; Cheska Taneo, 15; Tiffany Caniston, Marlon Pacqiao, ug Arnulfo Sandicona.

Matud sa mga bombero nga P2.5 milyones ang danyos sa sunog nga didto magsugod sa balay ni Bobby Hortezano. (BANAT NEWS)