Serging Osmeña Avenue giguba na aron sementohon

CEBU, Philippines -  Gisugdan na g’yud kagahapon ang pagguba sa kabahin sa Serging Osmeña Avenue likud nga bahin sa Radisson Blu Hotel ug wala mosipyat, nakamugna kini og problema sa trapiko sa mao nga lugar.

Si Joy Tumulak, ang operations officer sa City Traffic Operations Management (CITOM), miingon nga natural ra g’yud nga sa unang adlaw sa pag-usab sa rota masinati ang problema.

Matud ni Tumulak nga kun maanad na ang mga drayber nga sagad anha mag-agian sa mao nga dapit sa temporaryo nga rota mobalik na og kahapsay ang dagan sa mga sakyanan.

Ang mga drayber giawhag ni Tumulak nga sundon ra gayud ang mga traffic signs nga gipahiluna sa mga eskena aron mogiya kanila kun asa sila moliko.

Ang mga traffic signs adunay gibutang nga sign boards kun asa ang mga rota sa sakyanan moagi aron mogiya sa mga dili pa suheto sa bag-ong rota nga ilang subayon.

Ang pagsemento sa dul-an sa usa ka kilometro nga kabahin sa Serging Osmeña Avenue gihimo sa Department of Public Works and Highways (DPWH) ug gibana-bana nga molungtad og lima ngadto sa unom ka buwan ang paghuman.

Human sa pagsemento sa mao nga bahin sa Serging Osmeña Avenue, isunod na usab pagsemento ang kabahin sa mao gihapon nga karsada gikan sa General Maxilom Avenue extension lahus na sa eskena Palma.

Nahukman nga sementohon ang mao nga dapit kay kun aspaltohon lang dali ra gihapon nga maguba tungod sa daghang mangagi nga bug-at kaayong sakyanan nga maghatud ug maghakot og kargamento sa pantalan.   (BANAT NEWS)