Pagkahanaw sa Flight MH370 binuhatan ba sa terorista?

CEBU, Philippines - Gisubay karon sa international anti-terrorist units ang posibilidad nga mga terorista ang responsable sa hangtud karon gituohang na-missing nga Malaysian Airlines human masuta nga dunay duha ka kinawat nga pasaporte ang gigamit sa duha ka mga misakay niini.

Ang US Federal Bureau of Investigation mipadala na og mga imbestigador ug technical experts aron motabang pagsusi sa kamatuoran sa maong pagduda.

Ang Foreign ministry officials sa Italy ug Austria mikompirmar nga ang mga pangalan sa manipesto sa na-missing nga abyon mitakdo sa mga passports nga gikawat sa Thailand. Apan ang mga tag-iya niini wa mosakay sa maong mga abyon nga migikan sa Kuala Lumpur niadtong Sabado sa kaadlawon padung unta sa Beijing. Ang maong Italyano nga tag-iya sa usa sa mga pasaporte anaa pa karon sa Thailand samtang ang Austrian nakauli na sa ilang nasud.

Ang amahan sa maong Italyano mitug-an sa Associated Press nga ang pasaporte sa  iyang anak gikawat  kapin na usa ka tuig didto sa Thailand dihang gi-deposito niya kini sa usa ka car rental agency.

Matud pa nga ang iyang anak nga naa pa karon sa Thailand nakakuha na og bag-ong pasaporte aron lang makapadayon sa iyang biyahe sumala pa sa amahan niini.

Ang Italian Interior Ministry mipagawas og pamahayag nga natala sa Interpol database ang pagkawala sa pasaporte ni Luigi Maraldi niadtong Agosto 1, 2013.  Nahibaw-an nga gigamit diay ang iyang pasaporte sa misakay sa maong na-missing nga abyon dihang iyang nabasahan sa balita nga nalakip siya sa mga sakay sa maong abyon maong mitawag dayon siya sa Italy aron ipahibalo nga wa siya mosakay sa maong abyon.

Samtang si Austrian Foreign Ministry spokesman Martin Weiss mikompirmar nga ang pangalan sa manipesto sa usa ka  Austrian mitakdo sa pangalan sa gikawat nga pasaporte duha ka tuig na ang nakalabay, didto gihapon sa Thailand. Kadaghanan sa mga sakay sa maong na-missing nga abyon mga Chinese nationals kansang mga kabanay nagpunsisok ug nabalaka sa gidangatan sa ilang mga mahal sa kinabuhi samtang ilang gipaabot sa Beijing.

Samtang ang mga Vietnamese Navy mibutyag nga duna sila’y nakitang oil slicks sa dagat apan wala sila makakita og mga ebidensya nga nahagsa didto ang maong abyon.

Apan si  Azharuddin Abdul Rahman ang hepe sa Malaysian Department of Civil Aviation di mokompirmar  bahin sa oil slicks. Apan ang Malaysia Airlines nangandam na sa posibilidad nga nahagsa gyud ang flight MH370. Ang Pilipinas, Vietnam, Singapore ug China mipadala na og mga search and rescue vessels ug aircraft sa maong dapit aron motabang sa search and rescue efforts.

Ang US Navy mipadala na usab og surveillance plane ug usa ka destroyer nga dunay duha ka helicopters aron motabang.(AP/EIM)(BANAT NEWS)