Rama andam mopirma sa petisyon sa taga Apas

CEBU, Philippines - Ang mayor sa kagamhanan sa dakbayan sa Sugbu nga si Mayor Michael Rama andam mopirma sa petisyon nga mag-awhag unya sa Korte nga lugwayan pa og unom ka buwan ang naka-eskedyul nga demolisyon sa sitio San Miguel, Barangay Apas karong Martes, Marso 4. Wala pa maabot  kang Rama ang maong petisyon gikan sa opisina sa Division for the Welfare of the Urban Poor (DWUP) apan siya nagkanayon nga andam siyang mopirma niini.

Matud pang Rama nagmatngon gyud niini nga isyu aron di siya hisaypan.

“The usual thing is, I will always be available. Do not respond if you’re not also being requested; if you offer, you will be misunderstood, so do not be too aggressive.

Now if you treat my office right away I will sign if there such as thing as request,” si Rama nagkanayon.

Ang pangulo sa DWUP nga si Attorney Collin Rossel nagkanayon nga iya pang gi-finalize ang petition kauban ang abogado sa mga residente sa Apas nga si Attorney Feliciano Payot.

Si Rossell, sa pakighinabi sa Banat News, nagkanayon nga iya kining iduso sa opisina ni Rama karong adlawa.

Ang Korte mipagawas na og writ of demolition sa 157 ka mga balay sa sitio San Miguel karong Marso 4, kini human miduso sa reklamo ang nanag-iya sa yuta nga si Aletha Suico-Magat.

Kauban ang ilang kapitan nga si Ramil Ayuman, ang mga residente miawhag sa Konseho nga tabangan sila sa ilang problema kay di nila gusto biyaan ang maong luna nga ila nang gipuy-an sa 40 ka-tuig.

Ang mga residente nagtuo usab nga ang maong luna gipanag-iya sa probinsya sa Sugbu base sa Executive Order No. 20 nga nagpakita nga napalit niini ang maong luna gikan sa national government niadtong July 1, 1902.

Matud pa sa DWUP  himuon nilang rason aron pagpangayo og extension mao nga wala pay relocation site nga kabalhinan sa mga maapektahang residente kay ilaha pa kining pangitaan.  (BANAT NEWS)