Mga residente nahasol sa midahili nga yuta

CEBU, Philippines - Mga residente sa bukirang barangay sa dakbayan sa Talisay nahasol kini human midahili ang yuta ug mitabon sa karsada diha sa sitio Camp 5, barangay Manipis, dakbayan sa Talisay.

Ang maong pagdahili sa yuta nahitabo mga alas 11:00 sa buntag kagahapon ug maayo na lang nga walay  naigo ug layo usab kini sa kabalayan. Si Konsehal Antonio Bacaltos, Jr. chairman sa committee on environment sa konseho sa Talisay mibutyag sa Banat News kagahapon nga nahasol karon ang mga modulhog ug mosaka sa mga bukirang barangay.

Kahinumduman nga diha sa nahisgutang lugar dunay gipahigayong pagpalapad sa karsada sa Department of Public Works and Highways (DPWH) diin ang QM Builder maoy contractor niini. Matud ni Bacaltos nga ang QM Builder nagpahigayon na og clearing operation apan tungod sa baga sa yuta nga mitabon sa karsada giingong gabii pa kini maagian.

Gibutyag ni Bacaltos nga sa iyang mga pakisusi sa mga residente sa lugar giingong niadtong ulahing linog duna nay nangliki nga bahin sa maong gikabkab nga bukid  ug tungod sa pagsige og uwan midahili kini.

Matud ni Bacaltos nga modangop siya ngadto sa Mines and Geosciences Bureau aron masusi ang lugar ug makagama usab sila og lakang sa maong problema.  (BANAT NEWS)