Kahanas sa PAF ug JASDF sa HADR gipalambo

CEBU, Philippines — Aron mapalig-on ang kapabilidad sa depensa ug  mapalawom ang bilateral nga kooperasyon tali sa Japan ug Pilipinas, ang Philippine Air Force (PAF) ug Japan Air Self-Defense Force (JASDF) nipahigayon sa Doshin-Bayanihan 2024 didto sa Brigadier General Benito N. Ebuen Air Base sa Lapu-Lapu City, Cebu, gikan Oktubre 2 hangtod 6, 2024.

Ang “Doshin-Bayanihan” usa ka bilateral nga pagbansaybansay tali sa PAF ug JASDF nga nagtumong sa pagpalambo sa kapabilidad sa Pilipinas ug Japan sa Humanitarian Assistance and Disaster Response (HADR).

Kini nga hiniusang pagbansay nga nagpalig-on usab sa panaghigalaay sa PAF ug JASF, gihubad ngadto sa "Same Mind-Mutual Support" diin ang "Doshin" nagpasabut nga "same mind" sa Japanese, samtang ang "Bayanihan' nagpasabut nga "mutual support" sa Filipino.

Si Lieutenant Colonel Shotaro Arai, sa 1st Tactical Airlift Wing, JASDF miingon nga kini nga dako kining kahigayonan aron mapalig-on ang relasyon tali sa Japan ug Pilipinas.

Matud niya, haom ang Sugbu alang sa pagpahimutang Air Mobility Command (AMC) tungod kay naa kini sa sentro ug makaresponde dayon sa mga silingang nakapalibot niini.

Ang kinatibuk-ang 127 ka personnel gikan sa PAF ug 33 gikan sa JASDF nga nisalmut sa kalihukan nipailalom sa lain-laing mga pagbansay sa simulated airdrop flight training o ang low-cost, low-altitude drop, load/offload operations, aeromedical evacuation exercises, ug subject matter expert exchanges.

Atol sa pagbansay, ang pwersa sa PAF ug JASDF ni-deploy usab og C-130 Cargo Aircraft alang sa mga exercises. Si Maj. Bryan Jay Parajas sa PAF nagkanayon nga importante kini nga training exercise tungod kanunay maigo og mga bagyo ang Pilipinas.

Si Arai nagkanayon nga gawas sa deperensiya sa lengwahe wala silay nasugatang dagkong problema  .(BANAT NEWS)