390 ka guwang na nga marijuana gilarot

CEBU, Philippines - Mikabat  sa 390 ka guwang  na   nga punoan  sa  marijuana   ang gipanglarot   sa  kapolisan  didto  sa  sitio Malingin- Linoa,   barangay Togonon  sa dakbayan sa Danao  kagahapon.

Si  PO1 Doniel Capuyan sa kapolisan sa maong   dakbayan  mibutyag  sa  Banat News   nga  mga  alas 4:00 sa kaadlawon   kagahapon  nila  sugdi og  ibot  ang  maong  mga  tanom  ug  nahuman  sila  sa  alas 9:00 na sa buntag.

Matud pa ni PO1 Capuyan nga si Inspector Romeo Caacoy nga maoy ilang deputy chief  misulti    nga  ilang  nadiskobrehan ang  maong   plantasyon  sa marijuana  dihang  ila  kini  nalabyan  atol  sa  ilang  pagpatrolya.

Dugang pa ni PO1 Capuyan nga  gisulayan unta sa team ni Inspector Caacoy ang  pagsusi sa maong dapit  aron  mailhan  ang tag-iya sa maong mga tanom.

Apan  gumikan  sa  kalayo sa kabalayan  niini  naglisod   sila  sa pag-ila sa mga  nanag-iya niini.

Si PO1 Capuyan miingon nga kasamtangang gipundo   nila     ang maong mga  punoan sa marijuana sa ilang buhatan ug gitakda  nga ila  kining itugyan ngadto sa kapolisan sa  Cebu Provincial Police Office (CPPO) alang sa tukmang  desisyon  sa maong  mga tanom.  (BANAT NEWS)