“Drug pusher” nadakpan, shabu ug mga armas nasakmit sa CIB
CEBU, Philippines - Nasikop sa mga sakop sa City Investigation Branch ang usa ka lalaki sa buy bust operation ug nakuhaan og mga armas diha sa Purok 3, sitio Lupa sa barangay Kamputhaw pasado alas 10:00 kagahapon sa buntag.
Ang nasikop naila nga si Julius Arda, 36, molupyo sa samang lugar. Si Chief Insp. Romeo Santander nga nahinabi sa mga tigbalita miingon nga gipanid-an na nila ang suspetsado tungod kay nakadawat sila’g impormasyon gikan sa Regional Intelligence Division nga nalambigit ang maong suspetsado sa illegal nga kalihokan.
Miingon si Santander nga ang maong suspetsado gireklamo na nga magsige og pabuto kung makainom kini ug nalambigit usab kini sa pipila ka shooting incidents sa uptown areas.
Narekober gikan sa suspek ang 20 ka gagmay nga pakete ug usa ka dakong pakete sa shabu nga gibanabana nga mokabat og P30 mil.
Nakuha usab kaniya ang P200 nga buy bust money ug ang gidudahang halin sa illegal drugs nga P3,600 ug ang usa ka shotgun nga may duha ka bala, usa ka KG9 submachine pistol ug duha ka magazine nga puno sa bala.
Si Arda matud pa ni Santander usa ka level 2 nga drug pusher nga makadispatsar og 100 gramos nga shabu matag semana.
Sumala pa ni Santander nga si Julius Arda igsoon ni “Caloy†Arda nga usa sa suspect sa pagpusil patay ni Jessie Tabanao.
Ipaubos sa ballistic examination ang pusil sa suspetsado aron masuta kun nagamit ba kini sa mga shooting incidents sa dakbayan sa Sugbo.
Kasamtangan karong natanggong ang maong suspetsado sa Cebu City Police Office samtang giandam pa ang kasong kalapasan sa Sec. 5 ug 11 sa RA 9165 ug illegal possession of firearms. (BANAT NEWS)
- Latest
