Peke nga kUwarta mikatap sa Talisay City

CEBU, Philippines - Ang kapolisan sa dakbayan sa Talisay naalarma karon kabahin niining sunod-sunod nga mga tawo nga ilang nasikop nga nalambigit sa pagpamalit gamit ang mga mini nga kuwarta.

Unang insidente nahitabo niadtong Huwebes sa gabii diha sa barangay Tabunok, dakbayan sa Talisay.

Ang mga nasikop mao sila si Oliver Idol Allasio, 22, taga sitio Kimba, barangay Cansojong, dakbayan sa Talisay ug Vincent Illustrison Ceballos, 20, taga barangay Pitalo, lungsod sa San Fernando.

Ang biktima sa duha mao si Bonifacio Capilitan, 20, residente sa Bless,  Mambaling, dakbayan sa Sugbo ug vendor og mga cellphone diha sa Tabunok, Talisay.

Naembargo sa mga polis gikan sa posisyon ni Allasio ang usa ka mini nga P500 nga kwartang papel, usa ka Telego  nga cellphone kolor itom nga nagkantidad og P1,000 ug usa ka Samsung nga cellphone nga nagkantidad og P1,000.

Samtang tulo ka P500 nga mga mini nga kwartang papel, duha ka Samsung cellphone ang naembargo gikan sa posisyon ni Ceballos.

Giingong ang duha ka suspetsado mipalit og cellphone sa  biktima gamit ang mga mini nga  kuwartang papel nga usa ka P1,000 ug duha ka P500.

Si Capilitan human makabantay nga mga mini ang kuwartang gibayad sa mga suspetsado dali kining nangayo og panabang nila ni PO2 Arthur Santillan ug PO1 Romanito Dinapo nga mga mobile patrol police kinsa niadtong higayona nagpatrolya diha sa kadalanan.

Ikaduhang insidente nahitabo kagahapon sa kaadlawon diha sa barangay Lawaan I, dakbayan sa  Talisay.

Ang suspetsado mao si Juvy Lesonora Jaca, taga Mahayahay, Katipunan, Labangon, dakbayan sa Sugbo.

Human ireklamo ni Naomi Suerte Dela Cuesta, 28, taga barangay Pitalo, lungsod sa San Fernando ug branch manager sa usa ka fast food chain diha sa lugar.

Si Jaca gipasanginlang mibayad og mini nga P1,000 nga kuwartang papel ug dihang nabantayang peke kini daling mitawag si Dela Cuesta nila ni SPO2 Arlan Carillo ug PO1 James Cabrillos kinsa niadtong higayona nagpatrolya diha sa kadalanan.

Ang tulo ka nahisgutang suspetsado nangatingkagol karon diha sa Talisay City detention cell.     

Subay niini, si Supt. Resty Santos, officer-in-charge sa Talisay City Police Station nagkanayon nga naalarma sila sa maong  mga insidente ug nanawagan siya sa publiko nga magmabinantayon kanunay aron dili mabiktima sa mga badlongon.

Matud ni Santos nga mopahigayon sila og lawom nga imbestigasyon kung duna bay mga sindikato sa siyudad nga naggama og mga mini nga kwarta. (BANAT NEWS)