Kalungsoran sa habagatang Sugbo mipadala’g hinabang sa amihanan

CEBU, Philippines - Traynta ka mga sakyanan gikan sa sobra sa napulo ka mga munisipalidad ug dakbayan sa habagatang bahin sa probinsiya sa Sugbo nga puno og mga relief goods ang mibiyahe kagahapon sa buntag paingon ngadto sa amihanang bahin sa Sugbo nga grabeng naapektohan sa bagyong Yolanda.

Ang nahisgutang munisipalidad ug dakbayan nga mihatud og hinabang naglangkob sa dakbayan sa Naga, Carcar, Sibonga, Dalaguete, Oslob, Ronda, Badian, Ginatilan, Moalboal, Aloguinsan, Malabuyoc, Alcoy ug Pinamungajan.

Si Mayor Valdemar Chiong sa dakbayan sa Naga mibutyag nga mga food packs nga dunay  bugas, delata, tubig ug noodles ang ilang ipanghatag  ngadto  sa 15 ka mga lungsod sa amihanang Sugbu sa  mga isla sa Camotes ug Bantayan, lungsod sa Sogod ug Tabuelan. Ang Naga nagdala og lima ka mga dump trucks nga relief goods migahin og P1.2 nga hinabang diin gikan kini sa ilang calamity fund. Matud ni Chiong nga kanunay gyud silang mohatag og tabang ngadto sa ubang mga lugar nga naapektohan sa kalamidad bisan og gawas pa kini sa Sugbo.

Gibutyag ni Chiong nga human sa bagyong Yolanda silang mga mayor sa habagatang bahin nagkasabot kining maghiusa sa paghatag og hinabang.

Samtang si Mayor Ronaldo Sesante sa lungsod sa Dalaguete nagkanayon nga ang mao nilang paghatag og hinabang ngadto sa apektadong mga lugar usa sa paagi nila sa pagpasalamat sa Ginoo nga ang ilang lugar wala maapektohi sa katalagman. Ang Dalaguete mihatag usab og 1,700 ka putos nga mga relief goods. (BANAT NEWS)