Kiha sa naghuramentadong seaman gipasaka

CEBU, Philippines -  Kasong two-counts of murder ug multiple physical injuries ang gipasaka  sa kapolisan batok sa usa ka tawo nga mipusil patay sa iyang bayaw  ug  laing  usa ug miangol pa sa laing upat  ka mga sakop sa pamilya  didto sa barangay Poblacion, lungsod sa Compostela.

Si SPO4 Wilfredo Catorza, chief investigator sa  Compostela  Police Station mibutyag  sa Banat News  nga  ila  na  nga gipasakaan sa maong kaso  si Antonio Anderson Ramon, 45, nga maoy suspetsado sa pagpusil  sa iyang bayaw nga si Ozram Bacalla Caesar, 46, ug ugangan  nga si Apolonia Rabillas, 72, Lucilla, 43, Yelda Mae Rabillas Caesar, 18, Romeo Rabillas Jr., 32  nga pulos nagpuyo sa maong dapit. Apan  usa  sa mga  samaron namatay  usab.

Si PO2 Arnie  Guc-ong, imbestigador sa kapolisan sa maong lungsod miingon nga gikan nga nakig-inom ang  suspetsado sa iyang mga higala ug dihang nahubog na  miadto kini sa   balay sa  iyang ugangan nga si Apolonia kay nangita sa nakigbulag niining asawa nga si Annabelle.

Apan giingnan  siya  sa inahan  nga wala  didto si Annabelle  hinungdan  nga  mihiwasa  sa kasuko  ang suspek  dayong  lakaw  niini.

Apan matud pa ni PO2 Guc-ong nga sa iyang imbestigasyon  iyang nasuta  nga   sa alas 11:00 pasado sa maong kagabhion   mibalik ang maong suspetsado sa balay sa iyang ugangan ug nagpaboto kini og armas.

Si Ozram nga nakadungog sa boto sa armas dali nga migawas sa ilang  balay   ug  gisusi   ang maong boto, apan gipusil  siya  sa suspek ug  namatay  diha-diha. Dihang  migawas  ang  lima ka  angol , gipamusil  usab  sila  busa  pulos  sila samaron.

Nagpabilin  pa  silang  gitambalan sa  hospital  sa  dakbayan sa Sugbo  samtang  ang suspetsado  nagkagulkol  na  sa  bilanggoan. (BANAT NEWS)