Mga relief packs gipanghatag dayon sa DSWD7

CEBU, Philippines - Ang Department of Social Welfare and Development sa Central Visayas (DSWD 7) miandam og  kapin  sa  6,500 ka pinutos nga  hinabang  ug mikuha og kapin  sa usa ka gatos ka mga staff sa tibook rehiyon alang  sa pagdumala sa  Incident Command Center  sa mga probinsya sa Bohol ug Sugbo bisan sa wala pa mahitabo ang bagyong Yolanda.

Matud pa ni Semeon Remata III, usa sa mga tigpamaba sa DSWD 7 nga human  migawas ang maong bagyo ug usab human  maka-request og augmentation ang Local Government Units (LGU's)  sa miaging Biyernes, ang buhatan sa DSWD 7  mipagawas dayon sa unang batch sa relief packs  nga mikabat  sa  347 ka pakete alang  sa barangay Carreta, sa dakbayan sa Sugbo, 800 ka pakete alang sa syudad sa Mandaue ug 1,800 usab ka pakete alang  sa lungsod sa Consolacion.

Dugang pa ni Remata nga sugod sa alas 9:00 sa buntag kagahapon, ang buhatan sa DSWD 7 mipagawas og kinatibuk-ang 4,732 ka relief packs alang sa probinsya sa Bohol ug Sugbo samtang ang probinsya sa Negros Oriental ug Siquijor wala pa  sila  maka-request og relief assistance gikan sa buhatan sa DSWD-7.

Gipadayag ni Remata nga uban sa mga LGU sa Consolacion, ang DSWD 7 mihatag og relief packs didto sa Consolacion National High school diin mikabat  sa  180 ka pamilya o 1,032 ka mga indibidwal ang  nakadawat  niini sugod pa niadtong Biyernes.

Samtang matud pa usab ni Marine Auxcillo sa Municipal Social Welfare Office (MSWO) sa Consolacion,  nga nagsugod sila sa pagpabakwit sa mga pamilya nga didto manimuyo duol sa kasapaan ug kadagatan pipila ka adlaw sa wala pa moabot ang bagyo.

Si DSWD-7 Regional Director Mercedita Jabagat,  mipasabot nga ang papel sa DSWD-7 is for augmentation sanglit ang LGUs  mao man  ang mipahimutang   sa mga relief operations sa ilang tagsa-tagsa ka munisipalidad.  (BANAT NEWS)