Kaso ipasaka batok sa babaye nga nadakpang may armas ug bala

CEBU, Philippines - Gitakdang  pasakaan  na  og  kaso  sa sunod  semana  ang  babayeng  nadakpan  nga nagbaton og    armas   de fuego ug mga  bala.

Ang kaso nga kalapasan sa Republic Act 8294 kon illegal nga paghupot og armas de fuego   maoy ipasaka sa kapolisan   batok  sa  maong babaye nga nadakpan nga naghupot og tag-as nga kalibre sa armas ug mga bala sa barangay Poblacion sa dakbayan sa Danao alas 4:00 pasado sa hapon niadtong miaging adlaw.

Si SPO1 Jackson Rivera sa Criminal Investigation and Detection Group (CIDG) miingon nga ang maong babaye   nakuhaan nila og duha ka KG 9 ug mga bala sa sulod sa panimalay niini.

Matud pa niya nga nagkantidad og P16,000 ngadto sa P19,000 ang matag usa  ka armas nga ilang nasakmit uban sa  usa usab ka pistola ug 402 ka mga buhing bala sa kalibre 45 ug 150 ka mga bala sa laing kalibre sa armas.

Si Rivera miingon nga wala hiilhing supplier ang tighatod ngadto sa panimalay sa maong babaye  ug ibaligya usab kini ngadto sa iyang mga kustomer.

Dugang pa ni Rivera nga ang ilang nasakmit nga mga armas ug mga bala ilang ipadala ngadto sa crime laboratory isip ebidensiya nga ilang ipasaka  sa piskaliya sa dakbayan sa Danao karong sunod semana. (BANAT NEWS)