Namusil sa videokehan gikasoha’g frustrated homicide

CEBU, Philippines - Gipasakaan og kaso sa kapolisan sa dakbayan sa Lapulapu ang usa ka lalaki nga suspetsado sa pagpamusil sa sulod sa videokehan sa  barangay Pusok sa maong dakbayan   sa miaging  buntag.

Ang gipasakaan og kasong frustrated homicide mao si Christian Retuya, 20, nga nagpuyo sa maong dapit.

Samtang   ang  biktima nga  napusilan  mao si Guillermo Bacsal, 26, ulitawo nga taga barangay Looc, dakbayan sa Mandaue.

Matud pa ni PO2 John Carlo Jocotan sa homicide section sa kapolisan sa maong dakbayan nga nahinabi sa Banat News  nga kuyog sa biktima ang iyang bayaw nga nagpuyo sa maong dapit   nga  misulod  sa videokehan.

Samtang nag-inom og ilimnong makahubog  nagkanta-kanta  usab  sila  sa videoke hangtod nga miabot usab ang grupo sa batan-ong mga lalaki nga kauban sa suspetsado.

Nanglingkod usab ang grupo ni Retuya sa pikas lamesa sa sulod sa maong videokehan samtang nag-inom ug nagbanus-banus sila sa pagkanta.

Sa  paglabay sa pipila ka oras wala lamang damha nga nagkabikil  ang  duha  ka grupo  hangtod nga nagkalalis.

Dugang pa ni PO2 Jocotan nga taliwala sa mainiton nilang lalis  kalit  nga  gilanit  ni Retuya  ang  iyang armas de fuego  ug gipusil  ang ang lawas sa biktima.

Midagan ang biktima ug  ang bayaw niini pahilayo sa maong dapit ug didto  na  kini  makamatngon  nga  samdan  siya sa lawas  busa  dali  kining  gihatud ngadto   sa Lapulapu City Hospital.

 Human sa pasiuna nga pagtambal dali kining gibalhin ngadto sa Vicente Sotto Memorial Medical Center  sa dakbayan sa Sugbo.

Si PO2 Jocotan miingon  nga nakasibat ang suspetsado, hinungdan nga ilang gipangita apan bisan pa man niini ilang ipasaka ang kaso ngadto sa korte. (BANAT NEWS)